B-67 pingaarnertut nutaamik aningaasaliisoqalerpoq
Isumaqatigiissut ukiuni pingasuni atuutissaaq.
B-67 BankNordikilu aningaasaliinissamik isumaqatigiissusioqqammerput, taamaasillunilu banki Nuummi arsaattartut peqatigiiffiannut ingerlalluaqisumut pingaarnertut aningaasaliisunngortussanngorpoq.
BankNordik tusagassiutinut nalunaarummi allappoq.
Inerisaallaqqissut
BankNordikip Nuummi privatkundedirektøriata, René K. Sørensenip,
arsaattartut peqatigiiffiata suleqatigilernissaa qilanaarivaa.
- Qularnanngitsumik B-67 Nuummi timersoqatigiiffiit pingaarnersaasa ilagaat, timersullammannik inerisaallaqqissuupput, aammalu meeqqat inuusuttullu atugarissaartinneqarnissaanni pingaarutilimmik suliaqartuullutik. Inuiaqatigiit iluanni inuulluataarnermik ineriartornermillu siuarsaaqataasuupput, tamannalu
BankNordikip assorsuaq tapersersorusuppaa. Taamaammat timersoqatigiiffiup siumut ineriartortinneqarnissaata malinnaaffiginissaa assorsuaq qilanaaraarput.
Isumaqatigiissut pingaarutilik
B-67-ip siulittaasuata Jimmy Holm Jensenip aamma bankip pingaarnertut aningaasaliisunngornera nuannaarutigaa, siunissamilu BankNordikip suleqatiginissaa neriulluarnartoqartillugu qilanaaralugulu.
- Sulinitsinni aalajaatsumik suleqateqarnissarput assorsuaq pingaaruteqarpoq, taamaammat BankNordikip suleqatigilernera assut pingaartipparput. Inuusuttut atugarissaarnissaat pillugu aallussinerput, piginnaaneqarluartunillu siuarsaalluta suliniuteqarnerput bankimit taamatut maluginiarneqarneqarmat assut nuannaarutigaarput. Qujamasuutigaarput inuiaqatigiit akornanni iluaqutissanik suliniuteqarnitsinni bankip tapersersorusummatigut, Jimmy Holm Jensen oqarpoq.
Aningaasaliinissamik isumaqatigiissusiaq ukiuni pingasuni atuuttussatut aaqqissuussaavoq, BankNordikilu ukiuni taakkunani B-67-ip arsaattartuisa holdiinut tamanut pingaarnertut aningaasaliisuussaaq.
