ny film

B-52-ip nakkarnera filmiliarilerpaat

Sakkutuut timmisartorsuata B-52-ip Pituffiup eqqaani 1968-mi nakkarnera filmiliarineqalerpoq

B-52 1968-mi Pituffiup eqqaani nakkarnermini politikkikkut mamianartunik nassataqarpoq

Filmi pissanganartuliaq maanna suliarineqalersoq ’Idealisten’ tassaavoq 1968-imi amerikamiut sakkutuuisa timmisartorsuata B-52-ip qaartartorsuarnik brintimik imalinnik usilluni nakkarneranut tunngasoq, Berlingskemi allaaserineqarpoq.

Pituffiup eqqaani timmisartorsuup nakkarnerata kingorna saliineq arlalinnik mamianartorsiffiuvoq. Tassami paasineqarpoq timmisartorsuaq brintitalinnik qaartartunik usisoq, taamaasillunilu paasineqarluni isertuussamik Danmark USA-lu Nunatsinni atomimik sakkussiaqarnissamut isumaqatigiissuteqarsimasut. Piniartut aamma qallunaat Thulemi sakkutooqarfimmi sulisut radiop qinngualanerinit ulorianartunit eqqorneqartut peqqiilliornernik kingorna nalaataqartarput.

Tusagassiortoq maanna toqukkut qimagutereersoq Poul Brink pisimasumik qaqilerivoq tassanilu paasivaa pisimasoq politikkikkut mamianartortaqaqisoq Danmark isertuussamik sakkussiarsuarnut atomitalinnut politikkeqarsimammat. Poul Brinkip kingorna atuagaq ’Thule-sagen løgnens univers’ saqqummersippaa taannalu pisiarineqarluarpoq.

Maanna filmiliornermi ilitsersuisartoq Christina Rosendahl filmiliussamaalerpoq qulequtserlugu ’Idealisten’, taannalu aappaagu aggustimi takuteqqaarneqartussatut pilersaarutaavoq.

Filmi pingaarnertut inuttaassapput filmiliaritittartut Peter Plaugborg, Søren Malling, Thomas Bo Larsen, Jens Albinus, Nikolaj Cederholm aamma Helle Hertz, Berlingske allaaserinnippoq.

Powered by Labrador CMS