AWG: Nunatsinnit unammiartut Buffalomi ammaanersiornermut piareerput
Nunatsinnit Arctic Winter Gamesimi unammeqataasussat Canadami Wood Buffalomut tikissimalerput, unammiuaarnernullu peqataanissamut piareerlutik.
Ullumi sapaammi 29. januar Canadami Wood Buffalomi nal. 18.30-nngorpat Arctic Winter Gamesimut ammaanersiorneq aallartissaaq. Tassa nunatta nalunaaqutaa malillugu nal. 22.30.
Issittumi nunanit arfineq-pingasuneersut hunnorujulikkuutaat ilisaritissapput. Timersuutinillu assigiinngitsunik sapaatip akunnerani unammiuaarnissat taamaasillutik aallartissallutik. Rusland ukioq manna peqataatitaqanngilaq.
Wood Buffalomi ammaanersiornissaq sioqqullugu timersuutit ilaat unammissutigineqalereerput. Sapaammi futsalimi, hockeyimi kiisalu curlingimi unammisoqarpoq. Nunarpulli timersuutinik taakkunani peqataatitaqanngilaq.
Nunarpulli ataasinngornermi unammingaatsiassaaq. Tassa sulorarneq, nerrivimmi arsaararneq, volleyball, Arctic Sports aamma Dene Games unammissutigineqassangamik.
Timersuutit tallimani unammissasut
Arctic Winter Gamesimut unammiartut, aallartitat, sungiusaasut allallu katillugit 89-it Wood Buffalomut Canadamiittumi tikissimalerput.
Nunarput sulorarnermi, nerrivimmi arsaararnermi, Dene Gamesimi, Arctic Sport Gamesimi, Volleyballimi snowboardimilu peqataatitaqarpoq.
Pilersaarutit malillugit naggataarnersiorneq Buffalomi 4. februar nal. 15.30 ingerlanneqassaaq.
Arctic Winter Gamesimi unamminissamut pilersaarutit UANI takusinnaavatit.