AWG: Nappaammut illersuummik kapitinnissamut innersuussut nakorsaanerup itigartippaa

AWG 2020-mik aaqqissuisuusut coronavirusip, tassa covid-19-ip tuniluunnera nakkutigeqqissaarpaat. Arctic Winter Games Whitehorse, Yukon, Canadami 15. – 21. marts pisussaq, pilersaarutit malillugit ingerlanneqassaaq, coronavirusimummi tunillatsinnissamut aarlerinartoq annikittuararsuuvoq.

- Nunarsuaq tamakkerlugu coronavirusimik tunillaassuuttoqarnerani malunnaatilimmik allanngortoqarpat innersuussutit allanngortinneqaratarsinnaapput, Kalaallit Nunaanni Timersoqatigiiffiit Kattuffiata allakkiaani taama allassimavoq, allakkiami nakorsaq canadamiu arlalinnik innersuussuteqartuuvoq.

Influenzap tuniluussinnaanera

Unammiuaartoqarnissamik aaqqissuisut sakkortuumik innersuussuteqarput timersortartut unammiarlutik aallannginnerminni isumatusaarlutik iliussasut, Arctic Winter Gamesertoqarnerata nalaani nappaatit allat tuniluussinnaanerannut aarlerinartoqarsinnaasarmat.

Nunap aaqqissuussaqartuusup innersuussutaa ima allassimavoq:

- Timersoriartussat tikeraartussallu tamarmik aallannginnerminni illersuutissaqarluareernissaat, taakkununnga ilaatillugu influenzamut illersuummik kapitinnissaq, sakkortuumik innersuussutigineqarpoq. Timersortartut sumiiffimminni napparsimmaveqarfimminnut paasiniaasariaqarput, nappaatinut assigiinngitsunut illersuutinik naammaginartumik kapitissimanissartik paasiniarlugu.

- Timersortartoq kinaluunniit napparsimasoq, soorlu kiaqartoq, toqqusaaminik anniartoq, quersortoq, timmilluni imaluunniit meriartarluni napparsimasoq, aallannginnermini suminngaanneerfimmini nakorsanit nalilersorneqaqqaartariaqarpoq aallannginnerminilu immikkut akuersissummik tunineqarsimasariaqarluni.

Ataqatigiinngitsut

Influenzamulli illersuutissamik kapitissimanermi imaanngilaq coronavirusimik tunillatsittoqarsinnaajunnaassasoq, nakorsaaneq ilisimatitsivoq.

- Naagga, influenzamik napparsimanerit coronavirusilu, covid-19 assigiinngilluinnarput. Inuusuttut peqqissut influenzamut illersuuteqalertussanngorlugit kapitinnissaat aamma innersuussutigineq ajorparput, nakorsaaneq Henrik L. Hansen oqarpoq ilisimatitsissutigalugu soqutiginnittut coronavirus pillugu nakorsaaneqarfiup nittartagaani atuarnerusinnaasut.

Nakorsaaneq ilisimatitsivoq Arctic Winter Gamesimik aaqqissuisuusut timersortartunut kajumissutsiminnillu suliaqartunut peqataasussanut influenzamut illersuummik kapitinnissamut innersuussisimanera, peqqinnissaqarfiup nakorsaaneqarfiullu ilisimagaa.

- Angalanissamut tunngatillugu nappaatinut illersuutissamik kapitinnissaq atorneqartariaqassaaq, taannalu peqataasussat namminneerlutik akilertariaqassavaat. Illersuuteqartussatut kapitissimagaanni, kapitereernermi illersuuteqalerneq pipallattarpoq, ukioq manna influenzat atuuttunut taamaallaat illersuutaassalluni. Illersuut coronavirusimut illersuutaasinnaanngilaq, oqarpoq.

Aallarnissaq ernumassutissaqanngilaq

Henrik L. Hansen ilisimatitsivoq nakorsaaneqarfiup ernumanartoqartinngikkaa Yukonimut timersoriarluni angalasoqarnissaa, tamannalu unitsinneqartariaqanngitsoq.

- Yukonimi Arctic Winter Gamesertoqarnissaanut timersortartugut aallarnissaat ernumanartoqanngilaq.