AWG: Ketchelerluni ujaminnanniarneq

Whitehorsemi Yukonimiittumi Arctic Winter Gameseqarnissaanut martsip 15-at aallartittussamut sulorarnermi unammisartut arfineq pingasut toqqagaapput. Sulorartartut kattuffiat ujaminnalluarnissamut isumalluarpoq, nukarliili Canadap ilaaneersunit sakkortuumik unammillerneqassannguatsiarput.

Arctic Winter Games-riartussat maanna Nuummiittut. Tunorliit: Emilie Sørensen, Maluk Christoffersen aamma Oscar Isbosethsen. Saarliuvoq Karolina Josenius Josefsen.

Inuiattut erinarsuupput ’Nunarput utoqqarsuanngoravit’ appeqattaarneqartarpoq Arctic Winter Gamesimi sulorarnermi unammiffiusumi ujamminerit agguaasoqaleraangat. Inuusuttuaqqani nukarlerni angajullernilu Nunarput peqataatitaqassaaq.

Nunavut ilungersuuteqarpoq

- Ilimasuppugut kultinik sølvinillu Whitehorsemi Arctic Winter Gameseqarnerani arlalinnik pissarsiumaarluta. Angajulliit pingaartumik isumalluarnartoqarput. Tina Amassen Rafaelsen aamma Ejler Jensen pikkorilluinnartuupput taakkulu assut isumalluarfigivagut, sulorartartut kattuffianni Badmindon Kalaallit Nunaanni siulittaasoq Michael Kleist Sermitsiaq.AG-mut oqarpoq.

Inuusuttuaqqat nukarliit tassaapput porskimi Nuummi GM-qarneranni ujaminnattut. Taakku tamarmik siullermeerlutik Arctic Winter Gamesimi peqataassapput unamminernilu nunat assigiinngitsut qulingiluat peqataassapput.

- Taakku ilimanarpoq Nunavumeersunit aamma Yukonimeersunit unammillerluarneqassasut. Nunap immikkoortui taakku marluk pingaartumik inuusuttuaqqani nukarlerni siuariartorput. Sulorarnermi siuarsaaneq Nunavumi assut pimoorunneqarpoq nunarujussuarmilu inoqarfiit ungasinnerat Nunatsinnisut unamminartikkaluarlugu tupaallaatigisatsinnik assut pingaartumik nukarlerni sukkasuumik siuariartorput, Michael Kleist oqaluttuarpoq.

- Taamaattoq Thrune Amassen Rafaelsen siuariartupallappoq ilimanarluni angajuni nuannaartoralugu sukataartoq. Takussavarput tamanna qanoq pissarsissutaajumaarnersoq, Michael Kleist naggasiivoq.

Dommerit marluk aamma peqataassapput tassaasut: Kristian Degn aamma Heinrich Møller.

Nunatsinniit peqataasussat tassaapput:

Inuusuttuaqqat angajulliit:

  • Tina Amassen Rafaelsen
  • Karolina Josenius Josefsen
  • Kalaasi Svendsen
  • Ejler Jensen

Inuusuttuaqqat nukarliit:

  • Emilie Sørensen
  • Thrune Amassen Rafaelsen
  • Oscar Isbosethsen
  • Maluk Christoffersen

Angallassisut:

  • Anja Skov Kjeldsen
  • Nuka Amassen
Powered by Labrador CMS