Arctic Winter Games
AWG2016 millionilikkaanik sinneqartooruteqarpoq
Maanna naatsorsuutit naammassineqarput, allattoqarfiullu suliniut AWG2016 naammassilluinnalerpaa
- Unammiuaarnerit ingerlanneqareernerini, aammalu naatsorsuutit naammassineqareernerini nalunaarutigisinnaavarput suliniummut naatsorsuutit 8,6 millionit koruuninik sinneqartooruteqarfiullutik angusaqarfiummata.
AWG2016-ip aqutsisoqatigiivini siulittaasoq, Christian Kjeldsen, oqarpoq.
Atuaruk: Frimærki 120.000 koruuninik Arctic Winter Gamesimut tunisivoq
Aningaasat utertinneqassasut
Taassuma erseqqissarpaa, angusat AWG2016-ip allatseqarfianit sukangasuumik pitsaasumillu aqutsinermik, minnerunngitsumillu illoqarfimmi innuttaasunit annertuumik tapersersorneqarnermik ersersitsisut.
- Sinneqartoorutittaaq aamma naatsorsuutiginngisamik aningaasartuutissat ilaasa atorneqannginnerannik pissuteqarpoq. Aningaasat piginnuttunut utertissavagut, taakkulu aningaasat sumut atorneqarnissaat piffissami aggersumi isummerfigissavaat, kisianni ilimanarpoq suliassaqarfinnut AWG2016-imut uiggiutitunut tapersiissutigineqassasut, Christian Kjeldsen oqarpoq.
Atuaruk: Aaqqissuisut: Arctic Winter Gamesip aningaasartuutissai sipporneqanngillat
Sapaatip-akunnerata tulliani matussasoq
Allatseqarfiullu matuneqarnissaa tullinnguuppoq. Pisortap Maliina Abelsenip allattoqarfik suliniullu septembarip 15-ani matussavai, soorluttaaq Aqutsisoqatigiit aamma atorunnaarsinneqassasut.
- AWG2016-imi unammiuaarnerit iluatsilluareernerisa kingorna qujalluni inuulluaqqusisinnaaneq nuannersumik misinnarpoq. Suliniummut tapersersuineq annertooq misigalugu nuannerluinnarpoq. Inuit 4.000-it missaanniittut suliniummut toqqaannartumik attuumassuteqarsimapput, amerlasoorpassuillu malinnaapput. Pisortat, namminersortut aamma innuttaasut inuiaqatigiinni inissisimaffinni tamaneersut suliniutip iluatsinneranut pissutaapput. Tapertaasunut tamanut qujanarujussuaq, inuiaqatigiittut tamanna tulluusimaarutigisunnaalluarparput, pisortaq Maliina Abelseni oqarpoq.
AWG2016-ip allatseqarfiata matunerata kingunerissavaa AWG2016 pillugu saaffiginnissutaasinnaasut tamarmik, septembarip 30-ani 2016 aallarnerfigalugu, Kommuneqarfik Sermersuumi Tamanut Kiffartuussivimmut saaffiginnissutigineqartalissammat.