AWG 2016
AWG 2016 pingaarnertut aningaasaliisortaaqqippoq
2016-mi Nuummi Arctic Winter Gameseqarnissaanik aaqqissuisut aamma Mentorix aningaasaliisuunissaq pillugu isumaqatigiissuteqarpoq
Mentorix, suliniutinik aqutsinermik pikkorissaanernilu suliaqartoq, Arctic Winter Games 2016-mi Nuummi pisussami pingaarnertut aningaasaliisuussaaq. Arctic Winter Games 2016-mi pisortaq Maliina Abelsen aamma Mentoriximi piginneqataasoq Kenny Munck isumaqatigiissummut atsiortuupput.
Arctic Winter Games 2016 aningaasaliisussat pillugit isumaqatigiissutaasinnaasunik arfinilinnik immikkoortulinnik sanavoq. Taakkunani Nanoq sponsor tassaavoq 1 million koruunit sinnerlugit aningaasaliisoq. Tele Post pingaarnertut aningaasaliissutut aamma isumaqatigiissusiorfigineqareerpoq. Maannalu Mentorix 2016-mi Arctic Winter Gamesimi pingaarnertut aningaasaliisooqataassaaq.
Mentoriximik isumaqatigiissutip imarisaasa ilagaat suliniutinut aqutsinermi suleqatigiinneq aamma 2016-mi Arctic Winter Gameseqarnerani piginnaasanik qaffassaaneq.
Inuiaqatigiit pissarsiassaat
- AWG 2016 pisussaq asseqanngilluinnartoq, ineriartornissamut nutaamillu ataatsimoorfeqarnissamut ilasaataassaaq. Taamaattumik tunniussaqarsinnaanerput uagutsinnut nuannerluinnarpoq, tassani unammersuartitsinissaq qitiutillugu piginnaasatigut qaffassaaqataasinnaaneq pingaarnerutipparput, Mentoriximi piginneqataasoq Kenny Munck oqarpoq.
Aningaasaliisuunissamik isumaqatigiissut 2016-mi Arctic Winter Gamesip naammassinissaata tungaanut atuutissaq tamannalu inuiaqatigiinnut pissarsissutaajumaartoq neriuutigineqarpoq.
- Mentoriximik isumaqatigiissuteqarneq uagutsinnut pingaaruteqarluinnarpoq. Inuiaqatigiinni piginnaasat qaffassarneqarnissaat AWG 2016-imi qitiutinneqarnissaa pineqarpoq. Suliniutinik aqutsinermut piginnaasatigullu qaffassaanermut tunngasutigut taakku piginnaasaat ilisimasaallu iluaqutigalugit, nunat assigiinngitsut akornanni misilittakkat misilittagaqarfigilernissaannut assissaqanngilluinnartumik periarfissaqalissaagut. Tassunga peqatigitillugu aamma nuannaarutigilluinnarparput, suliffeqarfiup Mentorixitut ittup Kalaallit Nunaanni timersornikkut kulturikkullu aaqqissuussat annersaasa ilaanni peqataarusulluinnarusulluni aalajangersimammat, Arctic Winter Games 2016-mi pisortaq Maliina Abelsen oqarpoq.