AWG 2016-ip ilisarnaataa ilisaritinneqarpoq

2014-imi unnuk kulturisorfimmi Arctic Winter Gamesip, AWG2016-ip, ilisarnaataa tamanut ilisaritinneqarpoq. Tamanna pivoq rådhusimi, tassani borgmester Asii Chemnitz Narupip, AWG2016-imik ingerlatsisussami Host City-mi siulittaasup, ilisarnaat illoqarfimmi takussaalersussaq takutippaa.
Ilisarnaat sananeqarsimavoq Karsten Skjoldhøj-imit, ilusilersuinermik ingerlatsivimmik Designmind-imik piginnittumit. Taanna inuttaa ilisaritinnagu siunnersuutinit nassiunneqartunit dommerkomite-mit toqqarneqarpoq. Dommerit tassaaput Kunngi, Frederik Kristensen aamma Jette Brandt. Ilisarnaammi takutinneqarput AWG-mi peqataasut pingasut tasiortut, ataatsimoorlutik imminnut kivittut. Tamatuma saniatigut seqineq qaqqanut qinngorsimasoq, Nuup ilisarnaataa Sermitsiaq arsarnerillu. Ilisarnaatip ilusaa piumassuseqarpaluttuuvoq AWG-milu unammissutaasartunik takutitsilluni.
– AWG2016-ip ilisarnaatissaata ilisaritinnissaanut aggersinnaasimagassi nuannaarutigaara. Nuuk Arctic Winter Games-eqarnerani, nunarsuarmi annertunerpaamik issittumi timersuuterpassuarnik kulturimillu nittarsaassinernik aappassaaneerluni aaqqissuussisussanngorpoq. Siullermik 2002-mi Canadami Iqaluit aaqqissuusseqatigaavut. Misigisaq puigunaalluinnartuuvoq, taamanikkut Nunatsinni siullerpaamik ataatsimoorluta aaqqissuussinermi imatut ittumi nuannerluinnartumi piginnaanivut takutissinnaasimavagut. Arctic Winter Games-imut aaqqissuussineq suliassaavoq annertooq, suliffeqarfiit, timersoqatigiiffiit kulturikkullu peqatigiiffiit ataatsimoorlutik aatsaat suleqatigiinnerisigut iluatsilluarsinnaasoq, Asii Chemnitz Narup oqarpoq, taassumalu Hosst City-mi peqatigai ilinniartitaanermut, ilageeqarnermut, kulturimut naligiissitaanermullu naalakkersuisoq Nick Nielsen aamma Kalaallit Nunaanni Sulisitsisut Peqatigiiffianni siulittaasoq Henrik Leth.
– Kommuneqarfik Sermersuumi, Namminersorlutik Oqartussat namminersorlutillu inuussutissarsiuteqartut peqatigalugit peqariarfissaq manna ilassilluarlugu tiguarput, aammaarlutalu ikinngutivut issittormiut sapaatip akunnerani timersuuterpassuarnik kulturimillu sammisassaqarluarfiusumut tikeraarsarsinnaagatsigit tulluusimaarutigaara. Arctic Winter Games 2016-imi Nunatsinni qanoq isikkoqassanersoq takutissavarput, aammalu tikeraartivut nunatsinnilu innuttaasut sapinngisamik pitsaanerpaanik misigisaqartissallugit, Asii Chemnitz Narup oqarpoq.