Arctic Winter Games
AWG 2016-imi ujaminnattaat amerlassusaat GIF-ip nalilerpaa
Issittormiut unammiuaarneranni kalaallit peqataasut amerlasuunik ujamminnakkaluartut pitsanngoriarnissamut inissaqarpoq, GIF-ip generalsekretæria Carsten Olsen isumaqarpoq
Arctic Winter Gamesimi kalaallit peqataasut ujaminnattaatigut siuariarujussuarput, tassa Nuummi katillugit 81-inik ujaminnakkamik, ukiut marluk matuma siornatigut ukiuunerani unammiuaarnermi Fairbanksimi ingerlanneqartumi 60-inik ujaminnannikuullutik.
Kalaallit Nunaanni Timersoqatigiit Kattuffianni generalsekretærip Cersten Olsenip aamma ujaminnattaarpassuit naammagisimaarpai.
– Ataatsimut isigalugu amerlanerpaallu tulliinik 81-nik ujaminnakkatta tamanna akuerisassaalluinnarpoq, taanna oqarpoq.
Pitsanngoriarnissamut inissaqarpoq
Tamannali peqatigalugu tikkuarpaa pitsaanerusumik piareersarnikkut pisanngoriarnissanut inissaqartoq, Nuummi unammiuaarnerit nalaanni peqataasut ilaanni artukkerluni ajoqusernerpassuit eqqarsaatigissagaanni.
Timersoqatigiilli kattuffianneersup erseqqissarpaa Arctic Winter Games pingaartumik inuusuttut unammiuaarnerigaat.
– Taamaattumik siunissaq eqqarsaatigalugu neriuutigaarput inuusuttortatta peqataasimasut tamarmik, misilittagarilersimasatik inuunermik sinnerani ineriartorteqqikkumaaraat, Carsten Olsen oqarpoq.
Kalaallit Nunaata ujaminnattaavinit 81-init 39-it kuultiupput, nunanit peqataasunit tamanit amerlanerpaat tulleralugit.