Avissaarnissaq ukiuni 56-ini oqaluuserineqartoq
Sapaatip-akunnerisa pikkunartorsiorfiusut ingerlaneranni inatsimmut tunngaviusussamut missingiut nutaaq pillugu oqallinneq sakkortuseriataarpoq, Aki-Matildalu Folketingimi oqaatsit pillugit assortuunnermik aallartitsilluni. Kunngeqarfimmi pissutsit appasinnerpaaffissaminniilersutut isikkoqarput. Nutaarsiassaqarpali?
Nunatsinni Danmarkimilu politikerit oqaaseqartartullu naapertorlugit maajip qeqqani sapaatip-akunnerini marlussunni Naalagaaffeqatigiinnerup toqqaviani qannguluttoqarsimavoq.
Toqqavik quppaasimagunarpoq, atasinnaassanerpoq?
Aviisi AG taama allappoq.
Weekendavisenimi aaqqissuisuuneq allappoq, Kalaallit Nunaat Danmarkimit avissaariartulersoq. Berlingskemi oqallinnermut aaqqissuisoq isumaqarpoq, inatsit tunngaviusussaq pillugu siunnersuummi aqqutissaq naaperiaaffiunngitsoq toqqarneqarsimasoq. Ekstra Bladet naliliivoq »Høegh-Damip takutitsineratigut ulloq Danmarkimi qinersisartut naammatsiffigisaat qaninnerulersimasoq«.
Oqaaseqartartorpassuit ataatsmoorutigisaannik pissutsit nalinginnaanngitsumik ilungernarsisimasutut Danmarkilu kunngeqarfik annaanniarlugu iliuuseqartariaqartoq isumaqartoqarpoq. Apeqqutaavorli Kalaallit Nunaanni Danmarkimilu qinikkanik inoqartuaannarsimannginnersoq oqaaseqaatimikkut killingusaami avissaarnissamik inuit ilaasa takusaqarsinnaalerfigisaannik nipituuliortunik?
Apeqqut tamanna misissorniarlugu AG toqqorsivinni ujaasisimavoq, nutaarsiassaqarnera paasinarsilertorpoq. Siornatigummi inatsimmut tunngaviusussamut siunnersuummik suliaqartoqanngisaannarsimavoq, Folketingimilu politikerimik aatsaavissuaq kalaallisut oqaluttoqarluni.
Tamatuma akerlianik oqallorissaarneq pineqartillugu pissutsit nutaartaqarpallaanngillat. Ullumikkut oqallinnermi sakkortusaartoqaraluarpoq, qiterisaali – avissaarnissamik kissaat – ukiuni qulikkuutaani piusimavoq, ilaatigooriarlunilu malissiortoqangaatsiartoqarsimalluni.
Oqalugiaat silaarutaasarpasissoq
Oqaluttuarisaanermi pisarsimasut ilaat qimerlooriartigik ukiunillu 56-inik kingumut qiviarluta – 1967-imi decembarimut. Múte B. Egedep inunngornera ukiunik 20-nik sioqqullugu pisimasumut, tassanilu AG saqqummersinneqarpoq ima qulequtaqarluni: Nunatta namminersornissaa maanna anguniartariaqalerpoq! Taama oqariartuuteqartoq tassaavoq Inuit Partiip siulittaasorisimasaa, Ulrik Rosing.
- Kalaallinut peqqinnarnerpaassagaluarpoq inuiaqatigiissuseq pingaartillugu imminnut napatinniarlutik aalajangertuugaluarpoq, taanna oqarpoq.
Ulluni tulliuttuni aviisini Danmarkimi uippallertoqarnera allaallu Kalaallit Nunaanni ernumasoqarnera oqaluttuarineqarpoq. Landsrådip siulittaasua Erling Høegh Ulrik Rosingimut akissuteqartariaqartutut misigisimalerpoq:
- Tamanna silaarutaasarluni allaat kamanneruvoq. Tamannalu inuup ataasiinnaap piliaraa, Erling Høegh Landsrådi tamaat sinnerlugu sakkortuuliorluni oqarpoq.
Aviisimi AG-mi atuarnerusinnaavutit. Aviisi uani pissarsiariuk:
