tusagassiuutinut tapiissutit
Aviisip siulittaasua: Naqisimaneqanngitsunik aviiseqarneq saassunneqarpoq
Aviisinik suliap Kalaallit Nunaata avataani uissuummissutigineqarnissaa nunallu tusaamaneqarneranut ajoqutaanissaa siulittaasup eqqoriarpaa
Naalagaaffeqatigiinnermi tusagassiornermik suliaqartut misilittagartunerpaartaasa ilaata nunanik tamalaanik sammiveqartup nersualaarnertullu, Sermitsiaq.AG-p siulittaasuata, Jørgen Ejbølip, Naalakkersuisut aviisinut nuna tamakkerlugu saqqummersartunut 2014-imi tapiissutinik inatsisit unioqqutillugit tunniussinaveersaarnerat eqqumiigisorujussuuaa.
- Pisup ingerlasimanera kusanaappoq. Suliffeqarfittut innuttaasutullu inatsisit malinneqarnissaat naatsorsuutigineqartariaqarpoq. Suliffeqarfiit maanna piusut nutaallu nutaanik aningaasaliissuteqarnissamut nangaassuteqalissapput. Suliaq qanorluunniit sammivilersorneqaraluarpat matumani naqisimaneqanngitsumik aviiseqarnerup oqaaseqarsinnaatitaanerullu saassunneqarnerat takuarput. Kalaallit Nunaata tusaamaneqarnera nunat tamalaat akornanni ajoquserneqassaaq, oqarpoq.
Jørgen Ejbøl Kalaallit Nunaanni tusagassiorfiup siulersuisuinut ukiuni qulingajanni kingullerni ilaasortaasimavoq. Tamatuma saniatigut Danmarkimi aviisinik ullormut saqqummersitsisarfiit annerpaartaata JP/Politikens Husip siulersuisuinut ilaasortaavoq, tassanilu ukiorpassuarni aamma siulittaasuusimalluni.
Nunat tamalaat akornanni tusagassiornermut tunngasunik ilisimasaqarneranut takussutissat ilaatigut tassaapput The Danish-Egyptian Dialogue Institutemi kiisalu Washingtonimi The Executive Committee for World Press Freedom Committeemi siulersuisunut ilaasortaanera. Tamatuma saniatigut komitemut, UNESCOs World Press Freedom Prizemik agguaassisartumut, ilaasortaavoq.
Jørgen Ejbøl Naalakkersuisut tusagassiuutinut tapiissutinik aaqqissuusseqqinnerannik aamma isorinnilluinnarpoq, pisortanit tapiissutit suliniutinut aalajangersarneqartalersussaammata, maannamutut aviisinut marluinnik oqaasilinnut toqqaannartumik tapiissutaajunnaarlutik.
- Kalaallit Nunaanni inuiaqatigiit tusagassiuutit amerlanerusut nammassinnaanngilaat. Aningaasarsiornikkut tunuliaquttat piginnaanillillu naammanngillat, oqarpoq.
AG-mi Naalakkersuisut tusagassiuutinut allanneqarsimasunut nuna tamakkerlugu saqqummersartunut saassussinerannik allaaserisanik arlalinnik aviisimi sapaatip-akunnerani saqqummersumi ilanngussaqartumi annertunerusumik atuarit. AG sapaatip-akunnerani saqqummersoq matuma ataani pisiarineqarsinnaavoq: