tusagasiorfinnut politikki
Aviisinut ernumanartoq
Politikerit aalajangerput KNR ussassaarutinik iluanaarniuteqassanngitsoq. Tamanna - killormut sammigaluartumik - landskarsimut aviisinullu akisusinnaavoq
– Nersualaarparput pisortanit aningaasalersorneqartoq KNR ussassaarutinik iluanaarniarnermi unammilleqqusaajunnaarmat. Paasisinnaanngilarpulli tamassuma tusagassiorfinnut tapiissuteqartarnermut aaqqissuussinermut attuumassuteqartinneqarnera. Killormut sammerpasippoq aviisit tusagassiorfiillu allat attuumassuteqanngitsut taamaasillutik KNR-p annaasai matussutississammatigit. Imaanngilarmi qularnanngitsoq annoncit, KNR-p elektroniskimi saqqummiuttarsimasai, tamaasa tusagassiorfiit naqitat tigussagaat.
Taamatut AG-p aaqqissuisuunera Christian Schultz-Lorentzen aviisimi nuna tamakkerlugu saqqummersartumi apersorneqarluni oqarpoq. Oqaaseqaataanut tunngaviuvoq partiit naalakkersuisooqatigiit aningaasanut inatsit akuersissutigimmassuk, tassuuna KNR ussassaarutinik ilanngusseqqusaajunnaarluni. KNR tamatumuuna manna tikillugu ukiumut 5 millioner koruuningajannik isertitsisarsimavoq.
Politikerit iliuuseqarnerat KNR-mi ernumanartoqartinneqarpoq, aammattaarli aamma nunatsinni tusagassiorfinni allani ernumanartoqartinneqarluni.
Tassami KNR-p ussassaarutitigut annaasai politikerit taarserniarpaat aviisinut tusagassiorfinnullu allanut qilersorsimanngitsunut tapiissutit ikilisinnerisigut, tassa naalakkersuisooqatigiit isumaqarmata tusagassiorfiit allat annoncitigut annertuunik isertitaqartalissasut, KNR ussassaarutinik ingerlatsisarunnaarpat.
Nutaarsiassaqartitsiviup Sermitsiaq.AG-p pisortaata Poul Krarupip ujartorpaa Inatsisartut ataatsimut piffissamut sivisuumut tusagassiorfinnut politikkimik akuersissuteqarnissaat, tusagassiorfiit aalajangersimasunik atugassaqartillugit, ukiumiit ukiumut allanngorteriataarneqarneq ajortunik.
– Tusagassiornermik ingerlatsiviit pissutsit qularnartullit atorsinnaanngilaat, aaqqiipallannernik politikerillu ataasiakkaat isumaannik pilersinneqartartut Poul Krarup AG-mut oqarpoq.
Naalakkersuisooqatigiit tusagassiorfinnut tapiissuteqarnermik aaqqissuussineq allanngortippaat, Naalakkersuisut sapaatip akunnerani kingullermi pisortat sulisussarsiortarfiannik pilersitsinissamik aalajngiinerat ilutigalugu. Sulisussarsiortarfik pisortanit aningaasalerneqartoq, aviisini sulisussarsiorluni annoncinut toqqaannartumik unammillertussaq.
Allaaseritaq tamaat atuarusukkukku ataani e-aviisi pisiarisinnaavat.