Aviisimi pingaarnertut allaaserisaq: Erik Jensenip takorluugai

Aviisi Berlingske allappoq, IA Kuannersuarni aatsitassarsiorniarneq aamma ”Kalaallit Nunaanni imigassamik atornerluisoqarnera, meeqqanik atornerluisoqartarnera suliffissaaleqisoqarneralu pineqartillugit” erseqqinnerpaanik oqariartuuteqarluni qineqqusaarsimasoq.

- Partii (IA) paqumigineqartartut pillugit ammasumik oqaluuserinninnissamik ajornartorsiuteqarsimanngilaq, pingaarnertut allaaserinnittoq Siumut ”politikkikkut susassaqarfiit pingaarnerit arlallit pillugit erseqqarluttumik oqaaseqartarsimaneranik” maluginiagaqarsimasoq allappoq.

Kinamiunut nuannerpallaarnavianngitsoq

Aviisi allappoq, urani pissutigalugu Kuannersuarni aatsitassarsiortoqarnissaanut erseqqissumik naameerneq ”Kinamiunut nuannerpallaarnavianngitsoq”.

- Amerikamiut siullertut oqiliallaatigisimassavaat Kinap taamatut unikaallatsinneqarnera. Qinersinerulli inernera aamma naalagaaffinnut pissaanlissuarnut tamanut oqariartuutaasoq, Berlingskemit erseqqissaassutigineqarpoq, nangillunilu allalluni:

- Nunami imaanilu avatangiisinut sunniutaasinnaasut qularnartoqarnerat pineqartillugit Kalaallit Nunaat tuniniagaanngilaq. Oqariartuut tamanna sakkortuujuvoq, aammali piffissaq ungasinnerusoq eqqarsaatigalugu nakkutigineqartumik aatsitassarsiortoqarsinnaaneranut Kalaallit Nunaat pinngitsuuisinnaajunnaarsinnaammat sammisaq ilungersunartuuvoq.

Aviisi konservativiusoq allappoq, tupigalugu ”Kalaallit Nunaanni unammilligassarsuit eqqarsaatigalugit talerperlermi inissisimasutut politikkeqarnerup initunerunnginnera”.

Kinguneqaatissat annertuut

Informationsimi pingaarnertut allaaserinnittup oqaatigaa, IA ”silap pissusaanut annertoorujussuarnik kinguneqarsinnaasunik aalajangiussassaqartoq. Tassa Kalaallit Nunaannuinnaanngitsoq aammali nunarsuup sinneranut annertuunik kinguneqarsinnaasunik”.

Pingaarnertut allaaserinnittup oqaatiginiagaa tassaavoq, silaannarmut mingutsitsinngitsumik nunarsuarmi allannguiniartoqarnerani aatsitassat qaqutigoortut pinngitsoorneqarsinnaanngitsut, Kinallu nunarsuarmi isumalluutigineqartunik taakkunannga kisermaassilluni pilersuisuunerata avaqqunneqarsinnaannginnera eqqarsaatigalugu.

- Kuannersuarni isumalluutissatut periarfissat qataginnartinneqarnarput, mingutsitsinngitsumillu allannguisinnaaneq taamaalilluni aamma pinngitsoortinneqarluni. Neriuutigineqaannarsinnaavoq, IA aqqutissanik allanik nassaarniassasoq, assersuutigalugulu Killavaat Alanguanni aatsitassanik qaqutigoortunik uranitaqanngitsunilli qalluisoqarnissaanik anguniagaqassasoq, Information allappoq.

JP: Siumumi ileqqoq nuannarineqanngitsoq

Jyllands-Postenimit Kuannersuarni aatsitassarsiorniarneq annikitsuinnarmik eqqaaneqarpoq, akerlianilli Sumut sammineqarnerulluni.

- Siumumi politikkikkut aqutsisut ileqqorilersimavaat kammalaatersorneq imminullu sullinneq. Kalaallit Nunaanni ullumikkut inuuniarnermi annertuumik unammilligassaqartoqarneranut Siumut annertuumik akisussaaffeqarpoq, Jyllands-Posten allappoq, nangillunilu:

- Taamaammat partiimi siulittaasup Erik Jensenip qineqqusaarnermi Kalaallit Nunaata Tunngaviusumik inatsisissaa pillugu innuttaasunik taasititsinissamik neriorsuuteqarnera uppernarpasinnanilu akisussaaffimmik qimarratiginninneruvoq. Oqartussaaffinnik arlalinnik Danmarkimit angerlaassinissaq pillugu piviusorsiunngitsunik takorluugaqarnermut sanilliullugu kalaallit ullumikkut ajornartorsiutaannik nammineq partiilu isummertuuppata tulluarnerussagaluarpoq.

Partii maqaasineqarnavianngitsoq

Aviisip aamma Nunatta Qitornai appisaluuppai, oqaatigalugu ”naalagaaffinngornissaq qoqianngunartumik nipeqarlutik qaqittarpaat, assersuutigalugulu oqaatigaat, Kalaallit Nunaata Naalagaaffeqatigiit issittumi periusissiassamik suliaqarnerannit ilaajunnaarneq iluaqutigissagaa, aamma kingusinnerpaamik 2025-mi naalagaaffinngornissamut taasititsinissamik neriorsuuteqarput”.

- Partii maqaasineqarnavianngilaq. qinersinermi piviusorsiortut ajugaanerat Kalaallit Nunaannut iluaqutaasussaavoq, Jyllands-Posten allappoq, ilanngutassianilu imatut naggaserlugu allalluni:

- Danmark Kalaallit Nunaannut aqqutissiuisussaanngilaq aamma aporfilersuisussaanngilaq, kalaallit namminneerlutik aqqutissaminnik nassaarniarlutillu tunngavissiisussaapput.