Skip to main content

Avatangiisit pillugit nersornaat: Plastic not so fantastic innersuunneqarpoq

Facebookimi eqimattaq Plastic not so fantastic, Nunani Avannarlerni Siunnersuisoqatigiit avatangiisit pillugit suliniuteqartunut Nersornaasiuttagaannut, oktoberip 29-ani tunniunneqartussamut innersuunneqarput.

Kalaallit Nunaat Nunat Avannarliit Siunnersuisoqatigiivisa avatangiisit pillugit suliniuteqartunut nersornaasiuttagaannik ukiut aappassaannik nersornaaserneqarnissamut periarfissaqalerpoq. Siorna nersornaaserneqartut tassaapput Attumi Pinngortitap pisussuutai pillugit siunnersuisoqatigiit, Facebookimilu eqimattaq Plastic not so fantasticilu nersornaaserneqartussatut ukioq manna innersuunneqarluni.

- Tupaqqavunga. Tusarakkuli innersuunneqarsimanerput suli upperiuminaatsippara. Nuannerpoq, suliniummi aallartitseqataasoq Giiti Titussen oqarpoq.

- Innersuunneqarnitsinnut assut maniguuppunga. Aamma tulluusimaarnarpoq. Nuannaarpunga maniguullungalu, Pipaluk Lynge-Rasmussen, suliniummik pilersitseqataasoq oqaluttuarpoq.

Nunat Avannarliit Siunnersuisoqatigiivisa avatangiisit pillugit suliaqartunut nersornaasiuttagaa 25-ssaat ukioq manna tunniunneqassaaq. Nunat Avannarliit sessionianni Stockholmimi ingerlanneqartumi oktoberip 29-ani tunniussisoqalerpat, Giiti Titussen peqataassaaq. Nersornaat 350.000 koruuninik aningaasartaqarpoq.

Innersuunneqartut allat arfineq-marluk uani takusinnaavatit.

Greta Thunberg naligalugu

Plastic not so fantastic avatangiisit pillugit nersornaammik tunineqarnissamut innersuunneqartumik nukittuumik unammillerteqarpoq. Sverigemeersoq avatangiisit pillugit suliniuteqartoq, inuusuttuaraq Greta Thunberg, tallimanngornerit tamaasa “Fridays for Future”-mik taallugu akerliussutsimik takutitsisaluni piffissap sivikitsup ingerlanerinnaani nunarsuarmi tusaamaneqalerpoq, taannalu innersuunneqartunut ilaavoq.

Pipaluk Lynge-Rasmussenip ersertuanngivilluni oqaatigaa pinngortitaq pillugu suliniuteqartoq Greta Thunberg nuannaartorilluinnarlugu.

- Greta Thunberg naligigipput? Tamanna annertoorujussuuvoq! Nuannaartorisorujussuuvara! Innersuussinerlu una suliniuteqartunut allanut, nunani allaneersunut, soorlu Gretamut nunallu avannarliit akornanni peqatitsinnut attaveqalernissatsinnut suleqateqalernissatsinnullu atorluarsinnaavarput, Pipaluk Lynge-Rasmussen oqaluttuarpoq.

Innersuussineq

Nunat Avannarliit Siunnersuisoqatigiivisa kalaallit suliniuteqartut suliaat nersualaarpaat.

Innersuussinermut tunngavilersuut ima allaqqavoq:

- @plastic not so fantastic nassaariuminarluni nutaaliorlunilu takutippaa inuit nittartakkakkut attaveqatigiiffii atorlugit inuit kikkuugaluarpataluunniit suliniummik ataatsimik suliaqaqatigiilersinneqarsinnaanerat ajornanngitsuusoq. Plastikkip pinngortitamut avatangiisinullu pitsaanngitsumik kinguneqartarnera pillugu ilisimasanik siammarterisarput, aammali avatangiisinut mingutsitsinerit allat eqqartorneqartarlutik. Inuit naapiffiini ataatsimoorluni suliniutit nukittuunngortinneqartarput, ilisimasanik avitseqatigiinnikkut qanorlu iliornissamik siunnersuuteqarnikkut, pingaartumik plastik pillugu. Innuttaasut pisuussutinik atuinerat taamaasilluni allanngoriartuaarpoq, pinngortitamut avatangiisunullu iluaqutaasumik, Nunat Avannarliit Siunnersuisoqatigiivi nittartakkaminni allapput.

Maluginiarneqarsimaneq pillugu suliniuteqartut, Giiti Titussen aamma Pipaluk Lynge-Rasmussen nuannaarput:

- Innersuunneqarnerinnatta takutippaa allannguisinnaasimasugut. Suliniutit annikikkaluartut atorlugit sumorsuaq killittoqarsinnaavoq, Pipaluk Lynge-Rasmussen oqarpoq.

- Innersuunneqarnerput ilaasortatsinnut tamanut tunngatippara. Ilaasortagut qujaffigerusuppakka, sulerusunnerat ataqatigiinnerallu pillugit. Eqimattaqanngitsuuppat innersuunneqarsimassanngikkaluarpugut, Giiti Titussen oqarpoq.

- Kuserneerannguit aallartissutigigaanni sumorsuaq killittoqarsinnaavoq, soorlu nunarsuarmi suliaqartut peqatigilerlugit. Go green, Pipaluk Lynge-Rasmussen oqarpoq.

Suliniutit

Facebookimi eqimattaq Plastic not so fantastic maanna 3.874-inik ilaasortaqarpoq, ICC-mik WWF Naturfondenimillu suleqatigiinnerit maanna aallartisarneqarlutik. Brugseni aamma aappaagumut suleqataanissamut eqqarsaateqarpoq, sineriammi illoqarfiit Brugseni-qartut peqatigalugit eqqakkanik katersititsinissaq suliniutigalugu. Eqimattaq aamma CSR-imut attaveqarluni aallartereersimavoq, tassani eqqakkat pinngortitamiittut soorpiarnersut misissorneqarnissaat anguniarneqarluni.

- Plastikkiinnarmi pineqanngilaq, naak eqimattap aqqa taama allaqqagaluartoq. Eqimattami suliniutigaarput pinngortitap eriagineqarnissaa, pinngortitamullu eqqagassanik eqqaannginissaq, plastikkiugaluarpata plastikkiunngikkaluarpataluunniit, Pipaluk Lynge-Rasmussen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER