Inuiaqatigiinni akisussaaffik

Avatangiisit eqqarsaatiginissaat iluaqutaavoq - aamma allaffimmi

Plakatip qungujulasup allaffinni sulisut mingutsitsinaveersaarnissamik eqqarsartissavai

Plakatip ilamernga

Qaanaamiit Nanortalimmut namminersortut pisortallu allaffii 300-t sinneqartut piffissami matumani plakatinik takuminartunik paasissutissiisunillu nassiussuuffigineqarput, qungujulasumik avatangiisit pitsaanerusumik paarinissaannik siunnersuutitsialannik arlalinnik eqqaasitsisunik, CSR Greenland taamatut paasissutissiivoq.

Tunisassiornermik ingerlatsiviit

Avatangiisinut akisussaassuseqarnitsinnik tusaraangatta amerlanerpaat siullerpaamik eqqarsaatigisarunarpaat tunisassiornermik ingerlatsiviit, stoffinik mingutsitsisunik aniatitsisut imaluunniit imermik atuisorujussuit.

Sunniuteqaqisut

Aammattaarli allaffinnit nalinginnaalluinnartunit avatangiisit annertuumik sunnerneqartarput: Assersuutigalugu pappialarpassuit ullut tamaasa kopimaskiinakkoortinneqartartut, eqqagassat ulorianartut soorlu qarasaasiatoqqat innaallagissamullu pærit nukissamik sipaarutaasut, ataavartumik taarserneqarlutillu kasiilerneqartartut, imaluunniit nukissaq maangaannartitaq, igalaap ammannginnerani kiassaatip sakkukillinissaa puigorsimagaanni, imaluunniit qulliit tamaasa ikumatillugit allaffimmit anigaanni.

Qungujulalluni

– Ileqqut pitsaanngitsut, allaffimmiut tamatta ilisimagunakkatta, ilaat sammitinniarpavut - naveersiniarnata taarsiulluguli isermilluta. Plakatiliorniarsimavugut iikkamut nivinngarusunneqarusussinnaasumik - neriunartumillu ullut tamaasa uagutsinnik ´eqqaasitsilaartartussamik´ pisarnitsinnit avatangiisit eqqarsaatiginerulaarlugit iliortassasugut - qungujulasumik, Kommuneqarfiit kattuffianni KANUKOKA-mi avatangiisinut siunnersorti Zenica Gosvig Larsen tusagassiorfinnut nalunaarutikkut nassuiaavoq.

Suleqatigiit amerlasuut

Avatangiisinut plakati suleqatigiilluni pilersinneqarsimavoq CSR Greenlandimit, Royal Greenlandimit, Grønlandsbankimit KANUKOKA-millu, Saligaatsoq - Avatangiiserik natsap ataani, CSR-ip avatangiisinut suliniutaani peqataalluartuusoq.

Plakatimik titartaasuuvoq Christian Fleischer Rex.

Powered by Labrador CMS