Avatangiisinut aningaasaateqarfik nutaaq pilersinneqarpoq

Oceans North Kalaallit Nunaat septembarip 14-ani aningaasaateqarfittut pilersinneqarpoq. Aningaasaateqarfiup siunertaraa Issittumi nunat inoqqaavinik suleqateqarluni imartami avatangiisit aamma sinerissamut qanittutut sumiiffiit pillugit ilisimasanik katersuillunilu siammarterinissaq

- Amerikap Avannaani aningaasaliisartutut katuffiit qanimut oqaloqatigaagut, tassalu Kalaallit Nunaanni avatangiisinut aningaasaateqarfiit siulliit ilaannut, taamaalisukkullu NGO-mut iluatsitsinissaq qularnaarniarlugu, Oceans North Kalaallit Nunaanni qullersatut pisortaq Søren Stach Nielsen oqarpoq.

Siulersuisuni ilaasortat Kalaallit Nunaaneersut Canadameersullu

Aningaasaateqarfik Nuummi allaffeqarfeqarpoq. Aningaasaateqarfiup aallartinneqarnerminut aningaasaatissat qullersatut kattuffimmit Oceans Northimit koruunit 250.000-it pissarsiarisimavai. Aningaasaateqarfik arlaanaanulluunniit attuumassuteqanngilaq namminersortutullu ingerlanneqartussaalluni.

Piniarnermut, aalisarnermut nunaateqarnermullu Naalakkersuisuusimasoq, Jens Immanuelsen siulersuisuni siulittaasunngorpoq. Taannalu siulersuisunit ilaasortanit sisamanit suleqatigineqassaaq. Inuit Pisinnaatitaaffii pillugit Siunnersuisoqatigiini siulittaasoq, Sara Olsvig aamma inuiaqatigiilerinermi ilisimatooq Birger Poppel Canadameersullu marluk, tassa Hilu Tagoona aamma Louie Porta siulersuisuni ilaasortaalerput.

- Qullersatut kattuffiusoq Oceans North tassaavoq Canadami tunngaveqartutut avatangiisinut aningaasaateqarfik aamma NGO, 2011-miilli sumiiffinni soqutigisaqaqatigiit arlalippassuit suleqatigalugit Kalaallit Nunaanni suliniutinik sulissuteqartuusimasoq. Suliniutit ilaatigut tassaasimapput uuliakoornermut upalungaarsimanermut pilersaarutinik misissuinerit, Pikialasorsuaq pillugu Ataatsimiititaliarsuup siunissaanut Canadami-Nunatsinni periusissiaanik tapersersuineq, kiisalu piujuartitsisutut aalisarnermut iluarsaassinerit siuarsarnissaat, Søren Stach Nielsen paasissutissiivoq.

Ocean North nutaanngilaq

Qullersatut kattuffik ukiut qulit sinnerlugit Kalaallit Nunaanni suliaqartarsimavoq.

- 2015-imi Oceans North kalaallini suleqatigilikkani siulleq sulisorilerpaa, 2020-miillu Nuummi tunngaveqartutut Kalaallit Nunaannut suliniutinut allaffeqalerluni. Taamaattumik Kalaallit Nunaanni inuiaqatigiinnik aallaaveqartumik kattuffimmik suleqatigisavimmik pilersitsinissaq alloriarnerit pissusissamisoortut tullerisimavaat, aningaasaateqarfik allappoq.

Aningaasaateqarfiup ilaatigut sumiiffinni isumalluutinik uumassusilinnik aalisartut piniartullu ilisimasaannik nakkutiginninnerinullu tunngasumik Pisuna’mik suliniutip ineriartorteqqinnissaa sulissutiginiarpaa, aalisarnermilu atortunik annaasanik saliinermut tunngatillugu IAPP-mut tapersersuiniarpoq.

Inuit pisinnaatitaaffiisa ineriartortinnerini pilersitat paasisitsiniaasuusut, ilinniagaqarnermut tunngasut, sunulluunniit nungusaataanngitsut kulturimillu piujuartitsisut aningaasaateqarfiup tapersersorai, aningaasaateqarfik paasissutissiivoq.