Avatangiisinik illersuisartoq Nunat Avannarliit Killiit Siunnersuisoqatigiiffianni siulittaasunngortoq

Ukiut 36-t matuma siornatigut nunani avannarlerni killerni siunnersuisooqatigiit pilersinneqarput, siullermik Vestnordens Parlametariske Samarbejdsrådimik taaguuteqarluni.

Pipaluk Lynge Rasmussen Inatsisartut ukiakkut ataatsimiinnerannut atatillugu siulittaasussatut toqqarneqarpoq, tassa Nunat Avannarliit Killiit Siunnersuisoqatigiiffiannut Kalaallit Nunaannit aallartitassat inissititerneqarneranni siulittaasunngortinneqarpoq.

- Pipaluk Lynge-Rasmussen kalaallit aallartitaannut siuttuusassaaq, taamaalillunilu 2022-mi aggustip qaammataani ukiumoortumik ataatsimiinnissamut Nunat Avannarliit Killiit Siunnersuisoqatigiiivini siulittaasunngortussanngorluni.

Pipaluk Lynge-Rasmussenip ilaatigut avatangiisinik illersuisartuunini ilisimaneqaatigaa, aamma Inuit Ataqatigiit sinnerlugit Inatsisartuni ilaasortaavoq. Taanna Savalimmiuni politikkeri Henrik Old taarserlugu siulittaasunngorpoq.

Siunnersuisoqatigiit katillugit 18-inik ilaasortaqarput, ukiumullu marloriarlutik aalajangersimasumik ataatsimeeqatigiittarlutik. Nunanit tamanit ilaasortassat arfinillit nunani inatsisartunit toqqarneqartarput.

Nunat Avannarliit Killiit Siunnersuisoqatigiit anguniagarivaat:

• Nunat avannarliit killiit soqutigisaat pillugit suleqatigiinnissaq.
• Atlantikup avannaani isumalluutinik kulturinillu ataatsimoorluni nakkutiginninnissaq aamma nunat naalakkersuisui Naalakkersuisullu aqqutigalugit nunat avannarliit killiit soqutigisaannik ineriartortitsinissamut ikioqatigiinnissaq, minnerunngitsumik isumalluutinik aqutsinermi ilungersunartunik ajornartorsiuteqartoqarnerani, tassa mingutsitsisoqarnerani il.il..
• Nunat naalakkersuisuisa Naalakkersuisullu nunani avannarlerni suleqatigiissutaannik malitseqartitsinissaq.
• Nunat Avannarliit Killiit Siunnersuisoqatigiivinik suleqateqarnissaq aamma nunat avannarliit suleqatigiinneranni nunat avannarliit killiit soqutigisaannut atatillugit attaveqaataanissaq.
• Nunat avannarliit killiit suleqatigiiffiisa aamma inuiaat allat nunallu tamalaat suleqatigiissititaasa, tassunga ilanngullugu issittumi naalakkersuinikkut suleqatigiit akornanni naalakkersuinikkut attaveqaataanissaq.