Avatangiisinik illersuiniaqatigiiffiit Kuannersuarni suliniummut akerlioqatigiittut
Qaammatini kingullerni avatangiisinik illersuiniaqatigiiffiit nunarsuarmi tamaneersut, Kalaallit Nunaanni aatsitassarsiornikkut suliat ingerlasut isiginialeqqavaat. Kalaallit Nunaanni aatsitassarsiornikkut annertuumik ingerlatsinerit uuliasiornerillu unitseqqullugit kattuffiit 137-t Naalakkersuisunut kaammattuillutik maanna atsiorsimalerput.
Issittumi avatangiisit illersorniarlugit Kalaallit Nunaanni annertuumik aatsitassarsiornermik ingerlatsinerit uuliasiornerillu tamarmik unitsinnissaannut, avatangiisinik illersuiniaqatigiiffiit 137-t nunarsuarmi tamaneersut kalaallit danskillu naalakkersuinermik suliaqartut kiisalu EU kaammattorpaat. Kalaallit Nunaat illuanik isertitassanik annaasaqarnermut taarsiiffigineqartariaqartoq oqaatigineqarpoq.
Aviisi Sermitsiaq allappoq.
Urani Naamik, Nuup Kangerluata Ikinngutai, World Heritage Watch, Center for Vedvarende Energi, European Environmental Bureau aamma Noah, nalunaarummut atsiornernillu katersuiniarnermut suliaqartuupput, ilaatigut suliniaqatigiiffiit naalakkersuisutiguunngitsut arlallit nunani aatsitassarsiorfiusuneersuupput, soorlu Kasakhstan, Kina, Australien, Rusland, Afrika, Japan aamma Frankrig.
Issittumi pinngortitamik illersukkamik pilersitsisoqarli
Siunissami issittumut periusissiat imassaannut tunngatillugu Danmarkip, Kalaallit Nunaata EU-llu kajumissaaruteqarnissaq anguniagaavoq.
– Kalaallit Nunaanni atajuarsinnaasumik ineriartortitsinerup siuarsarneqarnissaata sumiginnarneqarsimaneranut una kalaallinut danskinullu naalakkersuinermik sulialinnut iliuuseqaqqusineruvoq. Avatangiisinut ajornartorsiutit aatsitassarsiornermut uuliamillu tunisassiornermut attuumassuteqartut sumiginnarneqarput, NOAH-mi oqaaseqartartoq, Niels Henrik Hooge aviisimut Sermitsiamut oqarpoq.
Aviisimi Sermitsiami atuarnerusinnaavutit: