Qaqortoq
Avataarsuata ujaraa Qaqortup avannaanut nakkarsorineqartoq
Qaqortumi innuttaasut arlallit arfininngormat unnukkut nalunaaqutaq aqqarnup missaani qaamaneq tungujartoq sakkortooq sekundini arlalinni isiginnaarsimavaat tamatumalu kingorna qatituumik qaarpallanneq tusaasimallugu
Qaamanerup sakkortuup arfininngormat unnukkut Qaqortoq sekundini arlalinni qaammartippaa. Innuttaasut arlallit qaammaallanneq takusimavaat. Ilaatigut Kujataani Politeeqarfimmi politikommissærip nunallu immikkoortuani pisortap Bent Ole Kleistip
Bent Ole Kleistip qimmini aneerullugu arfininngormat nalunaaqutaq aqqarnup missaani qaamaneq sakkortooq tungujuartoq takusimavaa kingorna qatitiuumik qaarpallattoq tusaasimallugu.
– Avannamut isigitillunga nuna qaamanermik tungujuartumik sakkortuumik qaammartinneqarpoq. Allaanngilaq nuna projektørinik sakkortuunik seqerneqartoq. Innaallagiarsuuvorli qaamasorujussuulluni tukingasumik nakkariartortoq, Bent Ole Kleist Sermitsiaq.AG-mut oqaluttuarpoq.
Innaallagiarsuaq kitaanit kangimut nakkariartorsimavoq, sukkasuumillu killingusaamut tarrilluni.
– Sekundini 2-3-ni qaamavoq. Ungasippasissorujussuuvoq nunarujussuarlu qaamanermik tungujuartumik qaammartillugu.
– Tarrereersoq qatitoorsuarmik qanngorpallattoq tusaavar, Bent Ole Kleist Sermitsiaq.AG-mut oqaluttuarpoq.
Qaqortormiulli aamma allap qaamaneq sakkortooq malugisimavaa qanngorpallattorlugu tusarsimallugu, nuliilu angerlarsimatillutik.
– Qaamaneq sakkortooq takuarput kinguninngualu qanngorpallattoq tusaallutigu, Bjarne Abelsen Sermitsiaq.AG-mut oqaluttuarpoq.
Innaallagiarsuaq, arfininngormat unnukkut Qaqortup eqqaanik qaammartitsisoq, Qaqortup avannaani takuneqarsimavoq.