Avataanit tikittut tamarmik angerlarsimaffimmi mattuteqqasassapput - ajunaarnersuaqarnissaanut upalungaarsimasussat nutaat

Kim Kielsenip ilimatitsissutigaa, avataanit tikittunut malittarisassat maanna sukaterneqartut. Avataanit tikittut tamarmik ulluni 14-ini angerlarsimaffimminni mattuteqqatinneqassapput, tassa tikinnerminni immikkut illuinnartumik suliassaqanngippata.

Ataasiornermi aappassaanik tusagassiortunik katersortitsisoqarmat Nunatsinni Nakorsaanerup avataanit tikittut angerlarsimaffimmi maatussaaqqanissaannut tunngavilersuutigineqartoq itisiliiffigaa:

- Inuilli immikkut aalajangersimasumik suliaqariartorlutik tikittut mattuteqqaneqassanngillat. Pisariaqartinneqartunik ilitsersorneqareerunik immikkut akuersissummik tunineqassapput, Nunatsinni Nakorsaaneq Henrik L. Hansen ilisimatitsivoq.

Atuarfiit ammatiinnarneqassasut

- Nunami tunillatsissimasup ataasiinnaanera eqqaamassavarput. Inuit nunami maani najugaqartut akornanni tuniluuttoqanngilaq. Taamaammat atuarfiit meeqqeriviillu matuneqarnissaannut tunngavissaqanngilagut, taakkumi matuneqassappata ajorluinnartunik arlalinnik kingunerlutsitsisoqassaaq, Nunatsinni Nakorsaaneq oqarpoq.

- Matussagutsigit inuppassuit assersuutigalugu peqqinnissaqarfimmi suliassanik pisariaqarluinnartunik suliarinnittartut angerlartittariaqassavavu. Matusinissatta pisariaqalivinnissaanut utaqqissaagut, Henrik L. Hansen oqarpoq.

Taanna oqarpoq, Tuniluuttumik nappaalanersuaqarnerani ataatsimiititaliaq Naalakkersuisut nutaanik suliniuteqqaqqullugit kingusinnerusukkut inassteqarsinnasoq.

Upalungaarsimasussat nutaat

Politimesterip Bjørn Tegner Bayip aamma ilisimatitsissutigaa, coronamut tunngatillugu upalungaarsimanissamut nutaamik aaqqissuussisoqartariaqarsimasoq, matumuuna upalungaarsimasut maannamut sanilliullugu sukkanerusumik aalajangiisarniassammata allattoqarfeqassapput.

Coronamut tunngatillugu suliaqartussat nutaat Naalakkersuisut Siulittaasuata Naalakkersuisoqarfiani pilersinneqarsimapput. Taakku inuttarissavaat Naalakkersuisut Siulittaasoqarfini pisortaq, naalakkersuisoqarfinni allani pisortat, kommunimi ataatsimi pisortaq kommunit tamaasa sinnerlugit issiatinneqartussaq, Nunatsinni Nakorsaaneqarfimmi sulisoq ataaseqaamma chefpolitiinspektøri politimesterilu.

Peqatigitillugu coronamut tunngatillugu ataatsimut allattoqarfissaq pilersinneqarpoq, allattoqarfik politiimit pisortallu suliffeqarfiutaanni assigiinngitsuni sulisunit ingerlanneqassaaq.

- Allattoqarfimmi aaqqiissutissat aalajangingassallu isumagineqartassapput. Tuniluuttumik nappaalasoqarnerani ataatsimiititaliap suliassaraa, aalajangikkat malinneqarnissaannut pissaanermik atuisariaqarnersugut ilisimatissalluta. Ilimaginngilara taamatut inissisimalernissarput, politimesteri oqarpoq.

Powered by Labrador CMS