Skip to main content

Avataanit sulisussarsiorneq ima akeqartarpoq

Ilinniagartuumik avataaneersumik Namminersorlutik Oqartussanut sulilersitsineq millionit kuartii sinnerlugit naleqarpoq. Ilinniagartuut agguaqatigiisillugu qaammatit 13-it nunatsinniittarput

Ilinniagartuumik inooqataanillu Nuup avataaneersumik Namminersorlutik Oqartussat allaffeqarfissuanut sulisussarsiorneq 282.500 koruuninik akeqartoq, Nuummiit atorfinitsitsineq 174.000 koruuninik naleqarpoq.

Tamanna aningaasaqarnermut aatsitassanullu naalakkersuisup, Demokraatineersup Anda Uldumip, Partii Naleqqameersup Per Rosing-Petersenip paragraf 37 naapertorlugu apeqqutaanut akissuteqaatani takuneqarsinnaavoq.

Per Rosing-Petersenip sulisussarsiortarneq pillugu apeqquteqaatini nassiussimavaa qulequtaq ukiorpassuarni qaqinneqartuartarmat, ‘pissutsilli ilorraap tungaanut ingerlangaarpasinngitsut’, nammineq apeqqummini isummersorneratut.

- Qineqqusaarnerni Naalakkersuisuliornermilu atsioqatigiinnerni qaqinneqartuarpoq, aamma kingullermi, nunatsinniilli qimarngusut ikiliartoratik, ilinniagaqarsimallutillu naammassinikut affaasa missaannaat naammassigaangamik utertarlutik. Assersuutigalugu nuna sanilerisatsinni Islandimi utertartut 90 procenti ukiorpassuarni sinneqqajuaannarpaa, utertorpassuillu maaniittullumi takornartatut misigitinneqartuarlutik. Qaavatigullu suli suliffissaaleqineq qaffasippallaarluni, Per Rosing-Petersen  paragraf 37 naapertorlugu apeqquteqaammini ilaatigut taama nassuiaavoq.

Agguaqatigiisillugu qaammatit 13-it nunatsinniittarput
Imalu nangilluni allappoq:

- Illuatungaani naassaanngiusartumik ukiorpassuarni tikisitsiortorpugut, tikisitallu agguaqatigiisillugu maaniittarnerat sivikilliartuinnarluni. Qanittukkut isumasioqatigiinnermi peqataagatta eqqartorneqarmat uppernarsisippara ukioq kingullerli tusartuagara, tassalu maaniittartut agguaqatigiisillugu qaammatit 13-t missaannaani maaniittartut.

Taamaattumillu Per Rosing-Petersenip aningaasaqarnermut aatsitassanullu naalakkersuisoq ilaatigut aperaa naammassisaqarluartarneq pillugu misissuisitsisoqarnikuunersoq.

- Naamik, naammassisaqarluartarneq pillugu misissuisitsisoqarnikuunngilaq, kisianni Aningaasaqarnermut Sulisoqarnermullu Aqutsisoqarfik (ASA) qitiusumik allaffeqarfimmi Nuummiittumi atorfiit inuttaqanngitsut inuttalerneqartarnerannut qanoq aningaasartuuteqartoqartarnersoq pillugu misissuisimavoq. Aningaasartuutinut taakkununnga ilaatigut ilaapput sulisussarsiorluni allagarsiinermi aamma piffissamik atuinermi, suliamik naammassisaqarfiusinnaagaluartumi naammassisaqanngitsoornermi annaasanut, ilinniartitsinermut, pisattat nassiunneqarnerannut, atorfininnermut atatillugu angalanermi aningaasartuutinut ilaalu ilanngullugit aningaasartuutit, Anda Uldum taama akissuteqarpoq.

Anda Uldumip paasissutissiinera najoqqutaralugu ilinniagartuumik inooqataanillu Nuup avataaneersumik sulisussarsiorneq imatukanneq akeqartutut nalilerneqarsivoq:

  • Atorfimmut atatillugu ineqartinneqarneq ilanngullugu 282.500 koruunit 
  • Atorfimmut atatillugu ineqartinneqarneq ilanngunnagu 274.500 koruunit

Ilinniagartuumilli Nuummeersumik aappalimmik sulisussarsineq imatukanneq akeqarpoq:

  • Atorfimmut atatillugu ineqartinneqarneq ilanngullugu 174.000 koruunit
  • Atorfimmut atatillugu ineqartinneqarneq ilanngunnagu 166.000 koruunit
Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER