Avannaata Qimussersua: Pissartanngorniuttussat siulliit anngupput

Avannaata Qimussersuartoqarnissaanut qimussit arfinillit Ilulissani anngupput.

Ilulissani qimussertartut peqatigiiffiat, Qimussersuaq 71-imi siulittaasoq, Hansiaraq Zeeb, Sermitsiaq.AG-mut ilisimatitsivoq anngunniunneq arfininngornermi 11. marts ingerlanneqarmat annerusumik perlasisoqarani ingerlaartoqarsimasoq.

Qimussit 18-it anngunniunnermi peqataapput, arfinillillu Avannaata Qimussersuanut anngupput. Annguttuni siulliulluni tikittoq akunneq ataaseq, minutsit 20-t sikundillu 44-t atorlugit 40 kilometer ingerlaarfigisimavaa.

- Qimusserfigeqaaq. Akinnat tungaanut aqqut manngilaaraluarpoq, qimussinut ilungersunarsinnaalluni. Sinnerali ajunngilluinnarpoq, qimussertullu silagissiorlutik apuuteqqaanniuupput, Qimussersaq 71-imi siulittaasoq, Hansiaraq Zeeb Sermitsiaq.AG-mut oqaluttuarpoq.

Unammersuarnissamut piareertut

Avannaata Qimussersua Ilulissani siorna ingerlanneqarpoq. Ukioq mannalu annguttut Sisimiunukarnissaminnut piareerluinnalerput.

Ilulissani annguttut ukuupput:

1. Milan Mathæussen
2. Kaali Lund Berthelsen
3. Ilannguaq Berthelsen
4. Kristian Tobiassen
5. Minik Olsvig Svendsen
6. Ville Siegstad

- Ville Siegstad ukioq manna 78-inik ukioqalissaaq. Avannaata Qimussersuani immikkut ukioqqortunertut nersorneqarnissaa naatsorsuutigisinnaalereerparput, Hansiaraq Zeeb oqarpoq.

Upernaviup eqqaani Innaarsuit, Ilulissani eqqaani Saqqami, Qeqertarsuarmi Sisimiunilu aamma anngunniuttoqareerpoq.

Qimussit katillugit 40-t Avannaata Qimussersuanut peqataassapput. Uummannami sikkorlunnera pissutigalugu KNQK aalajangerpoq Sisimiuni unammersuartoqassasoq. Hansiaraq Zeeb ilisimatitsivoq angalanissamut paasissutissat maanna utaqqiinnalerlugit, naatsorsuutigaluguli sapaatip akunnerani matumani angalanissat inissinneqarumaartut.

Sisimiuni 1. april unammersuartoqartinnagu sumiiffinni arlalinni anngunniunnerit aamma ingerlanneqassapput.