Avannaata Qimussersuanut unammisussat ikinnerusut
Avannaata Qimussersua Sisimiuni ingerlanneqalerpat qimussit 32-t unammeqataassapput. Taakkunannga arfineq-pingasut Sisimiuneersuullutik.
Avannaata Qimussersuanut peqataasussat angalanissaat KNQK-p maanna aallartippai.
Avannaata Qimussersuatut ajugaaniunnermi qimussit 32-t peqataassapput.
Avannaata Qimussersuanut qimussit 40-t nalinginnaasumik peqataasaraluarput.
- Qimussit ikinnerunerannut pissutaavoq sumiiffiit anngunniuffissat marluk ukioq manna peqataanissamut periarfissaqaratik nalunaarmata, KNQK-mi siulittaasoq, Mikkel Jeremiassen ilisimatitsivoq.
Aasiaat aamma Qasigiannguit anngunniutsitsinngillat. Peqataalinnginnermut pissutaasut ilagisarpaat qimminut akiuussusersuinerit naammassisimasannginnerat.
Annguttut ima inissipput:
- Upernavimmit: 3
- Uummannap sulluanit: 4
- Saqqaq: 3
- Ilulissat: 6
- Qeqertarsuaq: 5
- Kangaatsiaq: 3
- Sisimiut: 8
Angalatitsinissaq inissippoq
Kalaallit Nunaanni Qimussertartut Kattuffiata Avannaata Qimussersuanut peqataasussat angallannissaat assartuunnissaalluk piffissaq kingulleq sulissutigingaatsiarsimavaa. Unammersuarnissarmi Uummannamiit Sisimiunut nuunneqarsimavoq.
Avannaanili unammisussat assartuisussaat maanna aallerluni aallareerpoq, soorlu aamma Qeqertarsuup tunuaniit peqataasussat aaneqangajalersut.
- Peqataasussanik angallassinerit assartuussinerillu aallartereerput. Sisimiunilu 1. april unammersuarnissamut angumersissapput, Mikkel Jeremiassen oqarpoq.
Sisimiut Avannaata Qimussersuaqarneranik aaqqissuisuusussaanini pillugu immikkut ittumik qinnuteqarsimavoq qimussit amerlanerusut unamminermut peqataatikkumallugit. Tamanna KNQK-p akueraa.
Avannaata Qimussersuani siorna ajugaasoq, Anton Street Saattuneersoq ukioq manna aamma annguppoq.
