Avannaata Qimussersuani ajugaasoq kingullinngortinneqarpoq
Qimusserluni unamminermi Frederik Mathiassen ajugaagaluarpoq, ajugaasorli kattuffimmit allanngortinneqarpoq
Qimussertartut kattuffiata KNQK-ip aalajangerpaa unammersuarnermi ajugaasutut nalunaarutigineqarsimangaluartoq Frederik Mathiassen unammersuarnermi normu 34-itut inissinneqassasoq, kiisalu Ville Siegstad unammersuaarnermi ajugaasutut suaarutigineqassasoq.
Avannaata Qimussersua Qasigiannguani marsip 30-ani ingerlanneqarpoq.
Maleruagassanik unioqqutitsineq
KNQK-mi siulittaasoq Naja Siegstad nassuiaavoq, naammagittaalliortoqareernerata kingorna siulersuisut suliamik aallartitsisimasut.
- Frederik Mathiassen illerngit avataatigut sangusimavoq, avataanut sangusimagaanni ingerlaannaq unammiffiusumut uteqqissalluni unammeqataasoq uteqqittussaagaluartoq, uani taamaattoqanngilaq. Maleruagassaq siulleq tassani unioqqutinneqarpoq. Maleruagassap aappaa unioqqutinneqartoq tassaavoq unammersuaarnermi peqataasut tamarmik 40 kilometerinik ingerlaarnissaat, tassani ajugaasoq aamma unammiffiusoq tamaat atunngilaa, 500 meterit missaanniittut apuunnerminit amigaatigai, Naja Siegstad Sermitsiaq.AG-mut nassuiaavoq.
Taamaasilluni Ilulissanit Ville Siegstad Avannaata Qimussersuani pissartanngorpoq. Uummannamit Apollo Zeeb aappaattut inissippoq, Kristian Lundblad pingajuattut kiisalu Saattunit Anthon Street sisamaattut inisslluni.