Avannaata Qimussersuaaraa: Nukappiaraq ukiukippallaarnerarlugu peqataasussaajunnaartinneqartoq
Ilulissani angajoqqaat qulingiluanik ukiulimmut angajoqqaajusut KNQK-mit ilisimatinneqarput ernerat Avannaata Qimussersuaaraannut peqataasinnaajunnaartoq ukiukinnera pissutigalugu.
Nukappiaqqamut qulingiluanik ukiulimmut angajoqqaat ernerminnut ullumi nikalluallannartumik tusarliussassaqarput.
Nukappiararmi Avannaata Qimussersuaaraanut, Ilulissani aqagu ingerlanneqartussamut peqataasinnaajunnaartinneqarpoq. Peqataasinnaajunnaarnermut tunngavilersuutigineqarpoq ukiukippallaarnera.
- Pakatsinissaa ilimagilluinnarparput. Uagut aamma angajoqqaajusugut pakatsivugut. Sivisungaatsiartumik qimusserluni sungiusartarsimavoq qimmiminillu aqutsillaqqilluinnarluni. Upperilluinnaraluarparput aqqutaa ajunngitsumik ingerlaarfigisinnaagaa, nukappiaqqamut anaanaq, Nivikka Jeremiassen Sermitsiaq.AG-mut oqaluttuarpoq.
Nukappiaraq qimussertarluni ukioq tamaat qimmiminik sungiusaasimavoq. Ullut marluk qaangiuppoq inuuimmini qamutinik nutaanik tunisimmat:
- Qulingilualiimmat qamutissaanik tunivarput. Qamutit naammagai, ingerlanerillutillu. Nammineerluni aningaasaatini atorlugit aamma unammeqataanissaminut akiliivoq, allaallu qatserisartuniit tapersersorneqarluni qimmii nerukkaatissaqartinneqaraluarput, anaanaasoq oqaluttuarpoq.
Sillimaniarnermut killiliussat
Meeqqat Avannaata Qimussersuaaraqarnissaanut unammisussanngormata allagarsiussat piareersarneqartut kukkuneqarsimapput. Allagarsiussani allaqqavoq meeqqat 9-14-inik ukiullit peqataasinnaasut. Tamannali kukkuneruvoq, KNQK-mi siulittaasoq Johan Olsen oqaluttuarpoq.
Angajoqqaajusut KNQK-mit ullaaq ilisimatinneqarput ernerat peqataasinnaajunnaartoq.
- Meeqqat unamminermut peqataatinneqartarnerannut malittarisassat ataqqineqartariaqarput. Sillimaniarneq mianersornissarlu pillugit ukiut killilerlugit aaqqinneqarnikuupput, Johan Olsen oqaluttuarpoq nangillunilu:
- Avannaata Qimussersuaaraa 2013-imili ingerlanneqaqqaarmat aalajangerneqarpoq meeqqat qulileereersimasut 14-it tikillugit ukiullit peqataasinnaasut. Tunngavilersuutigineqarpoq meeqqat ukiukinnerusut nukanganerusinnaasarnerat, tamannalu mianernarsinnaasoq, oqaluttuarpoq.
Immikkut akuerineqarnissaq itigartinneqarpoq
Nivikka Jeremiassenip erseqqissaatigaa ernini illinerni atorneqartussani nammineerluni qimussersinnaareersoq. Ilanngullugu oqaluttuarpoq KNQK-mut ilisimatitsisimalluni immikkut akuerineqarnissaq pillugu. Tamannali KNQK-mit sulissutigineqanngilaq.
- Iluliarmiuuvugut, ernerput aamma unammiffissami qimussertareerpoq. Neriuppunga peqataaqqusaajunnaarnerup kingunerissanngikkaa unammisarnernut soqutigisaarunnissaa, Nivikka Jeremiassen oqarpoq.
Avannaata Qimussersuaaraa Ilulissani aqagu ingerlanneqassooq. Johan Olsen ilisimatitsivoq meeqqat 24-t peqataanissamut akuerineqarsimasut.