Avannaata Kommunia: taasinermi allakkat 123-t amigaataasut
Qaanaap Upernaviullu eqqaani helikopterit kinguaattoornerini sikullu angallavigiuminaannerani Avannaata Kommuniani kommunalbestyrelsissat inissititernissaanut kinguarsaapput.
Savissivimmut helikopteri ulloq qinersivimmi, tassa apriilip arfernganili kinguaattooqqavoq. Taamaalilluni taasinermi allakkat 34-usut nunaqarfimmiit Qaanaap eqqaaniit ingerlaqqissinnaasimanatik.
- Helikopteri kiisami tallimanngormat Savissivimmut tikippoq. Taasinermilu allakkat maanna Qaanaamiilerput. Sila ajunngippat taasinermi allakkat tamarmik aqagu Ilulissanut apississapput, borgmesterip allattaa, Kaaka Villadsen oqarpoq.
Avannaata Kommuniani kommunalbestyrelsitaassaq aatsaat inissititerlutik ataatsimiissinnaapput Nutaarmiuniit Innaarsunniillu aamma taasinermi allakkat tigugunigit. Nalinginnaasumik Nutaarmiunut helikopteqarneq ajorpoq. Sikulu angallavigiuminaannerani qimusserluni snescootererluniluunniit taasinermi allakkat nunaqarfiup sanilianut Tasiusamut apuunneqarsinnaanngillat.
- Taasinermi allakkat 15-t Nutaarmiuniipput. Allakkat Ilulissanut apissinnissaannut sikuerunnissaa sikulluunniit angallavigiuminarsinissaa utaqqineqaqqaartariaqarpoq, Kaaka Villadsen oqarpoq.
Inissititerneq sapaatip akunnerata tulliani
Tele-Post helikopterimik attartorluni Nutaarmiunut angalalersoq, Avannaata Kommunia paasissutissiivoq. Taamaalilluni taasinermi allakkat pingaaruteqaqisut Ilulissanut nassarneqassapput. Innaarsunnilu taasinermi allakkat aamma amigaatigineqarput. Helikopterit aamma ulloq qinersivimmiit kinguaattooqqapput. Silalu atoruminarpat helikopteri Innaarsunnut aqaguagu sisamanngornermi apissinnissaat naatsorsuutigineqarpoq.
- Air Greenland suleqatigalugu angallanneqarnissaat ataqatigiissaarparput, timmisartuutileqatigiinniillu qinersinermi paasissutissanik assartuiniarluni immikkorluinnaq suliniuteqartoqarpoq, tamatumanilu Tele-Postip qulimiguulimmik attartugaa aamma akuutinneqarpoq. Qinersinermi paasissutissat pissarsiareriarutsigit taasinernik kisitseqqissaarinerit naammassisinnaalissavagut, suullu tamarmik iluatsissappata kommunalbestyrelsimi ataatsimiinneq siullerpaaq sapaatip akunnerata tulliani pisinnaalissaaq, Nick Nielsen, Avannaata Kommuniani pisortaaneq oqarpoq.
Nick Nielsenip ilanngullugu oqaatigaa, kommunalbestyrelsip siullerpaamik ataatsimiinnissaa Uummannami borgmesterinngortussap Sakio Fleischerip illoqarfigisaani pissamaartoq.
Inatsisit taamaapput
Kommunalbestyrelsit aatsaat inissititersinnaapput qinersinermut ataatsimiititaliap qinersinerup inernera akuerippagu. Tassanilu taasinermi allakkat tigummineqartariaqarput. Taamaammat taasinermi allakkat soorlu fax-ikkut nassiunneqarnissaat inerteqqutaavoq.
- Malittarisassaq siulleq tassaavoq inissititerinerit maajip aallaqqaataatinnagu pisinnaanngillat. Aappaattut qinersinermi ataatsimiititaliap qinersinerup inernera akuereqqaartussaavaa. Akuerineqarnerani taasinermi allakkat tamaasa paarineqassapput, taama Nunamut Namminermut immikkoortortaqarfimmi pisortaq, Klaus Georg Hansen oqarpoq.