Avannaata Kommuniata aappaagumut aningaasaqarnissaq inissikkaa
Avannaata Kommuniani aappaagu aningaasanut missingersuut, ukiup naanerani 31,5 mio. kr.-nik sinneqartoorfiusussatut naatsorsuunneqartoq akuersissutigaa. Sanaartornermut aningaasaliissutit naleqqussarneqarput, sanaartugassat suliariumannittussarsiuunneqartarnerat iluatsissinnaasimanngimmat.
Avannaata Kommuniani amerlanerussuteqarluartut tallimanngornermi 25. november ataatsimiinnerminni aappaagumut aningaasanut missingersuut akuersissutigaat. Kommunimi borgmester, Palle Jeremiassen (attaviitsoq) kommunalbestyrelsemit kommunip aningaasanut missingiliussanut tapersersuisoqarluarnera nuannaarutigaa:
- Tulluussimaarutigeqaara kommune-p missingersuutai 2023-mut ukiunullu tulliuttunut tunngasut annertuumik isumaqatigiissutigigatsigit. Suliniarnissatsinnut tunngavissamik pitsaasumik pilersitsisoq, Avannaata Kommuniani borgmester Palle Jerimiassen oqarpoq.
Partiit tamarmiusut, attaviitsuusoq Minik Høegh-Dam minillugu, aningaasanut missingersuut 2023-moortoq akuersissutigaat.
Kommunip naatsorsuutigaa 996.260.000 koruunit isertissallugit. Isertitat affaata missai akileraarutinit isertissangatinneqarput, Namminersorlutillu Oqartussanit bloktilskudit 552 mio. koruuniullutik.
Ingerlatsinermi kisitsisit pingaarnerit imaapput:
- Ilaqutareeqarnermut: 326 mio. kr.
- Ineriartornermut: 311 mio. kr.
- Allaffissornermut: 170 mio. kr.
- Pilersuinermut: 15 mio. kr.
- Teknikkimut tunngasut: 50 mio. kr.
- Inuussutissarsiornermut tunngasut: 27 mio. kr.
- Sanaartornermut tunngasut: 80 mio. kr.
Kommunalbestyrelsep naatsorsuutigaa kommunip karsiani 31. december 2023 31,5 mio. koruuninik missingiunneqarsinnaasut.
Sanaartornerup iluani suliassat arlallit kinguartinneqartut
Avannaata Kommunia kommunimi sanaartortitsiniarnermi ilungersunartorsiorsimavoq. Kommunalbestyrelsep tallimanngornermi ataatsimiinnermi oqaluuseraat sanaartornissamut aningaasaliissutini 2022-mi 30,6 mio. koruunit atorneqarsimanngitsut.
Suliassat suliariummannittussarsiorneqartaraluartut, taamaattoq neqeroortoqartarsimanngilaq.
- Malugilluinnarparput sulisinnaasunik annertuumik amingaateqarneq taamaalilluni sulianik allartitsinisamik periarfissat kinguarsarneqarlutik, soorlu aqqusernit atuarfiliornerit, aningaasaliiffigereernikuungaluartut, borgmester Palle Jerimiassen oqarpoq.
Sulisussaaleqineq pissutigalugu sanaartornissamut aningaasaliissutit aappaagumoortut kommunalbestyrelsep nalimmassarpai, 80 mio. koruuninngorlugit.
Kommuni ukioq manna sanaartortitsinissamut aningaasaliissutit 82,7 mio. koruuninut missingiussimagaluarpai, 30,6 mio. koruunilli atorneqanngitsoorsimapput.
Kommunimi akileraarut nikisinnagu 28 procentiutinneqassaaq.
