Avannaata Kommunia: Sanaartornissamut missingersuut anginerusoq

Kommunimi aningaasaqarneq 12 million koruuninik pitsanngoriarfiuvoq

Kommunalbestyrelse ukioq manna februaarip 19-iani siullermeerluni ataatsimiippoq. Oqaluuserisassaq ataasiinnaavoq: Avannaata Kommuniani ukiup 2019-ip sisamaraarterutaani aningaasaqarniarnikkut killiffik.

Avannaata Kommunia nittartakkamini allappoq.

Pilersaarutit

Kommunip 2019-imi ukiup naaanerani aningaasaatissaatut 58,6 millioner koruuninut missingersuusiarisimasaralui 71,4 millioner koruuninik inerneqarput, taamalu pitsanngoriaat 12 millioner koruuniulluni. Naafferaalluni akilersuinerit, soorlu isertitassat, akiligassat aamma aningaasartuutissat piffissani assigiinngitsuni naatsorsuusiorfigineqartartut suli naammassineqanngikkaluarput.

- Immikkulli ittumik pisoqariataanngimmat karsimiittuutit 71,4 millioner koruuniuinnarnissaat naatsorsuutigineqarpoq, kommuni allappoq.

Avannaata Kommuniani borgmesteri Palle Jerimiassen oqarpoq:

- Sanaartugassanik kissaatinut missingersuutit ataatsimiititaliani aammalu kommunalbestyrelsimi qaqinneqartareerput. Piviusorlu unaavoq; sanaartugassanik suliassinneqartartunik sanasunillu isorliunerusuni sanaartugassanik suugaluartunilluunniit neqeroortitsiniaasarneq ilungersunartuuvoq. Maannali Nuugaatsiarmiut Illorsuarmiullu ajunaarnersuaqarnerani eqqugaasimasut illuliuunneqarnerat naammassiartulermat sanaartugassanik suliassinneqartartut neqeruullattaallutik aallarteqqipput. Sanaartugassanillu suliassinneqartartut ilaat Upernavimmi sannavimmik pilersitsisinnaanermik eqqartuilersimavoq.

Sanaartornerit

2020-mut sanaartornissamut missingersuusiarineqartut 94,2 millioner koruuniullutik 2018-imi naatsorsuutiniittunut 81,6 millioner koruuniusunut sanilliullugit qaffasinnerupput. 2019-imi sanaartugassaagaluit 2020-mi naammassineqartussanngortut 7,8 millioner koruuninik naleqarput, sanaartugassatut suliniutit ukiuni sisamani pituttorfigisat 29,6 millioner koruuninik naleqarput aammalu sanaartugassat Namminersorlutik Oqartussat aningaasaliiffigisaat 32,1 millioner koruuninik naleqarput.

- Suliniutit ilaatigut tassaapput Ilulissani inissiat 24-t, Upernavimmi Tasiusamilu kivittaatiliinissat aammalu Saattuni tulattarfimmi majuartarfiliinissaq kivittaatiliinissarlu, Ilulissani, Uummannami aammalu Ilimanami attakut aqqutaannik iluarsartuussinissaq, Uummannami Ukkuissanilu ulluunerani paaqqinnittarfiliornerit, atuarfinnik iluarsartuussinissat aammalu Upernavimmi nunagissaanissaq. Ilulissani, Upernavimmi aammalu Uummannami asfaltilerinermi atortussanik pisineq, Innaarsunni nutaamik atuarfiliornissaq aammalu Uummannami eqqagassalerinermi eqqakkanik tigooraavilionissaq ilanngukkaanni sanaartugassanut 94,2 millioner koruunit missingersuusiarineqarput, nalunaarutigineqarpoq.

Powered by Labrador CMS