Avannaata Kommunia: Borgmesterinngorniunneq aallartippoq
Palle Jerimiassen borgmesteritut akisussaaffini imaaliallaannaq iperarnianngilaa. Minik Høegh-Dam tapersinngilara, oqarpoq.
Avannaata Kommuniani borgmesterip issiaviani issianiuuttoqalerpoq. Palle Jerimiassen qinersinermi uani borgmesteritut inissisimanerminit peerneqarsinnaanngorpoq. 338-init taaneqarsimagami parteeqatiminit Minik Høegh-Damimit qaangerneqarpoq, taanna taaneqarnerpaalluni 406-init taaneqarsimammat.
Palleli tunniutiinnalersaanngilaq.
- Naamerluinnaq tunniutiinnarnianngilanga. Uannut taasisimasut takutippaat qinersiseqarluartunga. Qinigaaffimmi kingullermi kommunip ineriartortinnera ingerlassimavara, tamannalu qinersisartut qinerlunga tatiginninnerminnik takutitsipput, Palle Jerimiassen oqarpoq.
Palle Jerimiassen 2017-imi qinersinermi 159-init taaneqarpoq, taamaammat maanna qinersinermi qinersisai marloriaammik amerlanerulersimapput.
Allagaatit takutikkit
Palle Jerimiassen oqaluttuarpoq Minik Høegh-Dam nammineerluni aperisimallugu paasissutissanik piumaffigalugu. Paasissutissalli tunniunneqanngimmata, Jerimiassenip Høegh-Dam Avannaata Kommuniani borgmesterinngornissaanut tapersersinnaannginnerarpaa.
- Paasissutissanik piumaffigisimavara. Paasissutissat inummut ataasiakkaamut tunngasuummata oqaatigerusunngilakka suut piumasimanerlugit. Kisianni paasissutissat piumasakka tigusimanngilakka, uppernarsaatinilluunniit arlaannik pisimananga, taamaammat taama inissisimatilluta tapersersinnaanngilara, Palle Jerimiassen Sermitsiaq.AG-mut oqarpoq.
Taama nalunaarneq Palle Jerimiassenip Sermitsiaq.AG-mut itisilerusunngilaa, erseqqisssaatigaluguli politikkikkut pikkorissusermut tunnganngitsoq.
Tapersersortissarsiorpoq
Palle Jerimiassen Sermitsiaq.AG-mut ilisimatitsivoq Siumumi ilaasortaqatiminut mailersimalluni tapersersorneqarnissani pillugu. Maanna akissutisinissani utaqqivaa.
Avannaata Kommuniani kommunalbestyrelse 17-inik ilaasortaqartarpoq. Siumut qinersinermi arfineq-pingasunik ilaasortaatitaqalissaaq. Atassut, Demokraatit, Inuit Ataqatigiit aamma Naleraq katillugit arfineq-pingasunik ilaasortaatitaqartussanngorpoq. Taamaammat Siumup Avannaata Kommuniani ilaasortaatitaa ataasiinnarluunniit illuarpat, eqimattaq ikinnerussuteqalertussaavoq.
- Parteeqatimma akinissai maanna utaqqivara. Akineqanngikkuma taava partiit allat tusarniarfigissavakka, tapersersorneqarnissara pillugu. Takutereerpara kommuni tamakkiisoq ineriartortissinnaallugu, tamanna aamma ingerlateqqikkusuppara, oqarpoq.
Palle Jeremiassen ilisimatitsivoq kommunalbestyrelse nutaaq suli ataatsimiigiaqquneqarsimanngitsoq. Ataatsimiinnermi siullermi inatsit malillugu borgmesterimik toqqaasoqartussaavoq. Borgmesterinngorumalluni sassartoq ikinnerpaamik kommunalbestyrelsemi ilaasortat affaannit taaneqarsimassaaq.