Avannaata Kommunia Kommuneqarfik Sermersoorlu misilittakkanik avitseqatigiittut
Illoqarfiit pingaarnersaata kommuniani Meeqqanut Ilaqutariinnullu Ataatsimiititap Avannaata Kommunianut tikeraarnera, kommunit taakku marluk unammilligassaqarfiit arlallit pillugit suliaqartarneq pillugu isummersoqatigiinnertut ilusilerneqarsimavoq
Kommuneqarfik Sermersuumi Meeqqanut Ilaqutariinnullu Ataatsimiititami ilaasortat ukiumut ataasiarlutik nunanut allanut paasisassarsiornissaminnut periarfissaqartut, nunani allani coronap atugaanera pissutigalugu ukioq manna angalanissamut pilersaarutitik allanngortittariaqarsimavaat. Nunanut allanukarnissaraluamut taarsiullugu Kommuni Qeqertarlimmut Avannaatalu Kommunianut angalasimapput, matumanilu akisussaaffeqarfinnut arlalinnut tunngatillugit misilittakkannik avitseqatigiittarnissamut kommunit periarfissinneqarsimallutik.
- Taamaasilluni meeqqanik angerlarsimaffiup avataanut inissiisarneq, siusinaarluni soraarnerussutisiaqartarneq aammalu suliffissarsiortunik sulilersitsiniaaneq, angerlarsimaffeqanngitsut, akissarsiffiup nalaani sulisussaaleqisarneq allarpassuillu pillugit isummanik paarlaasseqatigiittoqarpoq, Avannaata Kommunianit taamatut tusagassiorfinnut nalunaaruteqartoqarpoq.
- Taamatut isumasioqatigiissinnaaneq assut pissarsinarpoq, kommunimmi akornanni isummersoqatigiissinnaaneq maqaasinartarmat, soorlu KANUKOKA-mi isummersoqatigiittarsimanitsitut ittut, Ane Egede Mathæussen, Kommuneqarfik Sermersuumi Meeqqanut Ilaqutariinnullu Ataatsimiititami ilaasortaq oqarpoq.
Ataatsimeeqatigiinnq pissarsinartoq
Unammilligassaqarfinnik isumaginnitarnerup saniatigut Avannaata Kommuniani suliniutitut ingerlanneqartut allat Kommuneqarfik Sermersuumit tikeraartunut paasissutissiissutigineqarput.
Tamatumani ilaatigut Hotel Arcticip kitaa-tungaani illoqarfiup ilassutissaa aamma Kangiata Illorsuanik sanaartornerup ingerlarsornera aammali arsarnerit pillugit ilisimatusarfissamik pilersaarutit corona pissutigalugu uninnganerat pillugit paasissutissiivigineqarput.
Kommuneqarfik Sermersuumit tikeraartit tassaapput Meeqqanut Ilaqutariinnullu Ataatsimiititami siulittaasoq Uju Petersen aamma ilaasortat marluk Inge Olsvig Brandt aamma Ane Egede Mathæussen kiisalu pinaveersaartitsineq pillugu immikkoortortami aqutsisoq Gerda Fleischer aamma allatsi Misu Benjaminsen.