Avannaata Kommunia illoqarfiit ineriartortinnissaannut ingerlatseqatigiiffiliulerpoq
Avannaata Kommuniani kommunalbestyrelse aalajangerpoq kommuni illoqarfiit ineriartortinnissaannut ingerlatseqatigiiffimmik, Avannaata Development A/S-imik pilersitsissasoq. Kommuni inissianik, illuutinik aamma aningaasaliissutigisassatut suliniutinik ineriartortitsinissaq,sanaartornissaq, piginnittuunissaq ingerlataqarnissarlu suliarineqartussanngorlutik.
Kommunalbestyrelse septemberip arfineq-pingajuani ataatsimiinnermini aalajangerpoq illoqarfiit ineriartortinneqarnissaannut ingerlatseqatigiiffimmik piginneqatigiiffiusumik, Avannaata Development A/S-imi oktoberip aallaqqaataani 2019-imi pilersitsisoqassasoq.
Avannaata Development A/S pilersinneqareerpat suliniutit siulliit piareersarneqalissapput, taakkulu pisortat namminersortullu aningaasaliisartut suleqatigalugit ingerlanneqassallutik.
- Avannaata Development A/S-ip pilersinneqarnissaa sivisuumik piareersaasiorneqarpoq, illoqarfinnillu ineriartortitsinissamik ingerlatseqatigiiffik kommunimi tamarmiusumi ineriartortitsinissaq siunertaralugu pilersinneqarpoq. Ingerlatseqatigiiffimmi pisortassamik ukioq manna novembarip qaammataani atorfinitsitsinissarput naatsorsuutigaarput, Palle Jerimiassen, Avannaata Kommuniani borgmesteri tusagassiutinut nalunaaruteqarnermini oqarpoq.
Nuuk illoqarfiup ineriartortinneqarnissaanut ingerlatseqatigiiffimmik, Nuuk City Development A/S-imik 2017-imi pilersitsereersimavoq.
100 %-imik kommunimit pigineqartoq
Avannaata Development A/S kommunimit 100 procentimik pigineqassaaq, piginneqatigiissutillu aningaasartaat 5 milliuunit koruunit aallarniutigineqassallutik. Suleqatigiissitap ingerlatseqatigiiffiup nutaap aningaasaqarnera nalilersussavaa.
- Suleqatigiissitami Avannaata Kommunia, Elmann Advokatpartnerselskab aamma Deloitte sinniisuutitaqassapput. Elmann Advokatpartnerselskab taakkuupput kommune sinnerlugu ingerlatseqatigiiffiliornissamik siunnersuummik suliaqartuusut, Avannaata Kommunianit tusagassiutinut nalunaarummi allassimavoq.
- Siunissaq qaninnerusoq eqqarsaatigalugu ingerlatseqatigiiffiup Avannaata Kommuniata illuutaanik ingerlatsisuulersinnaanera nalilersorneqassaaq. Tamatumalu kingorna suleqatigiissitami Avannaata Kommuniata illoqarfinnik ineriartortitsinissamik pilersaarusiaanik piviusungortitsinissaq aningaasalersorneqarnissaalu siunnersuusiorfigineqassaaq.
Suleqatigiissitaagallartussap aallaqqaammut aningaasalersorneqarnera Avannaata Kommuniata aammalu illoqarfinnik ineriartortitsinissamik ingerlatseqatigiiffiup akornanni kiffartuussinissamik isumaqatigiissuteqarnikkut isumagineqassaaq. Ingerlatseqatigiiffiup Avannaata Kommuniata illoqarfinnik ineriartortitsinissaanik ikiuinissaa kiffartussinikkut isumaqatigiissusiornikkut qulakkeerneqassaaq.