Avannaa: Partiit Siumumik isumaqatigiinniarnertik piffissaligaanngitsumik unitsikkallarpaat
Avannaata Kommuniani Siumup iluani aaqqiagiinngittoqarnera pissutaalluni partiinit allanit isumaqatiginninniarfigineqarumanngilaq.
- Siumup iluani ataatsimoortoqannginnera pissutaalluni isumaqatiginninniarusunngilagut.
Avannaata Kommuniani partiit Naleraq, Atassut, Demokraatit aamma Inuit Ataqatigiit taamatut Siumumut oqariartuuteqarput. Kina borgmesteriussanersoq Siumup iluani ataatsimoorfigineqartinnagu partiit Siumumik isumaqatiginninniarusunngillat.
Taamaattumik Isumaqatigiinniarnerit piffissalingaanngittumik unitsikkallarneqarput.
- Partiit sisamaasugut isumasioqatigiissinnarluta isumaqatigiippugut ilussinni paaseqatigiissinnaanngikkallartillusi aggersaanerit isumaqatigiinniarnerusinnaasumut sammiveqartut piffissalingaanngittumik unitsikkallarlutigit, Bendt Kristiansen (IA) Naleraq, Atassut, Demokraatit aamma Inuit Ataqatigiit sinnerlugit tusagassiutinut nalunaarummi allappoq.
Aamma piumasaqaatigaat suut paasissutissat taamak pingaaruteqartigisut aporfilersuutaalersimanerat inuiaqatigiinnut nassuiaatigineqassasut.
Avannaata Kommuniani kommunimut qinersinermi Minik Dam-Høegh taaguunneqarnerpaavoq, taamaattumik borgmesterinngornissani siunnerfigalugu. Taamaattoq Palle Jerimiassen, qinigaaffimmi kingullermi borgmesteriusoq, borgmesteritut akisussaaffini imaaliallaannaq iperarnianngilaa. Minik Høegh-Dam borgmesteritummi tapersinngilara.