Avannaaniittunut nutaarsiassatsialak: Immap naqqatigut kabeli iluarsineqarpoq

Umiarsuup immap naqqatigut kabelimik suliarinnittup unnuaq nalunaaqutaq 04.00 kittorartoorneq Sisimiut avannaatungaaniittoq naammassivaa.

Telemi atuisut Aasianniit Upernavimmut qaammatini arlalinnit radiokæde atorlugu attaveqareerlutik, maanna kiisami sukkaasumik interneteqaleqqinnertik nuannarutigisinnaavaat.

- Immap naqqatigut kabelip Sisimiut avannaaniittup iluarsaanneqarnera iluatsilluarpoq. Qujanartumik iluliarsuit akornutaanngillat, sulinerlu naatsorsuutigisamit ullormit ataatsimik sukkaneruvoq, pisortaaneq Kristian R. Davidsen Sermitsiaq.AG-mut ilisimatitsivoq.

Kujammukartoq

Kittorarsimanera paasineqarmat umiarsuup immap naqqatigut kabelimik suliarinnittartup siku pissutigalugu suliarisinnaanikuunngilaa, tamannalu aamma pissutigalugu attaviileeqqinniarneq sivisuvoq.

- Umiarsuaq maanna kujammut ingerlaarpoq, Qaqortup kitaani kittoraqqasoq iluarsaakkiartorlugu, pisortaaneq ilisimatitsivoq. Kujataani suliarinninneq sapaatip-akunnerisa arlaqanngitsut matuma siorna unitsinneqarpoq, sila pissutigalugu umiarsuaq suliaqarsinnaanngimmat.

Sisimiut avannaani kittorartoqarneranut suna pissutaanersoq suli ilisimaneqanngitsoq, Kristian R. Davidsen ilisimatitsivoq. Kittorarneranut suna pissutaanersoq teknikerit kittorarnera misissuiffigeqqaartariaqarpaat.

Juullip aappaannili ingerlatseqatigiiffik ajutoornernik nalaataqaqattaarpoq, tamannalu Kalaallit Nunaanni atuisorpassuarnut eqquivoq. Kujataani kittorartoorneq, aamma Sisimiut avannaani kujataanilu kittorartoornerup kinguneranik radiokædetoqaq atorneqartariaqarnikuuvoq, taamatullu aamma Canadamut attavilerneqarluni.

Powered by Labrador CMS