Avannaani qulimiguullit amerlanerussanngillat
Uummannami aamma Upernavimmi angallannermi unammillernartoqaraluartoq, Naalakkersuisut qulimiguullit amerlinianngilaat, Kujataani amerlineqaqqammerput.
Attaveqaqatigiinnermut naalakkersuisup nutaap Karl Frederik Danielsenip, Sakio Fleischerimut akissuteqarnermini ilisimatitsissutigaa, ‘’unammilligassat, ilaasunik angallassinermi kiffartuussinermik isumaqatigiissuteqarfiusuni innuttaasut misigisartagaat Naalakkersuisunit eqqumaffigineqartorujussuupput’’, taanna allappoq.
Aningaasaqanngitsoq
- Ilinnut ilisimatitsissutigisinnaavara, Naalakkersuisoqarfinniit kiffartuussinermik isumaqatigiissuteqarfiusuni qulimiguulinnit sullinneqarnerit amerlineqarnissaannut periarfissat misissuiffigineqarsimammata. Kisiannili ajorarluartumik aningaasatigut sinaakkusiussat iluanni Uummannap Upernaviullu eqqaanni qulimiguulinnit sullinneqarnerit amerlineqarsinnaanngitsut paasinarsisimavoq, Karl Frederik Danielsen Sakio Fleischerimut ammasumik allagaqarluni apeqquteqartumut allappoq.
Isumasioqatigiisitsinernut innersuussisoq
Naalakkersuisoq nutaaq illuanik attaveqaqatigiinneq pillugu isumasioqatigiinnernut innersuussivoq.
- Pissutsit isumasioqatigiinnerni taakkunani saqqummiunneqartut allanneqarput, aammalu kiffartuussinermik isumaqatigiissuteqarfiusuni sullissinermut tunngatillugu isumaliutissanut ilanngunneqassallutik, avannaani innuttaasunut pakatsinartumik taama akissuteqarpoq.
Karl Frederik Danielsen attaveqaqatigiinneq pillugu upernaaru isumasioqatigiittoqarnissaanut innersuussivoq, tassani kiffartuussinermut isumaqatigiissutit maanna atuuttut qaangiuppata qanoq ilusilersorneqarsinnaanerat misissorneqassaaq.