nuna ikuallattoq
Avannaani nuna ikuallattoq siaruariartorunnaarsinneqarpoq
Saqqap Qeqertallu akornanni nuna ikuallattoq qatserisartut qamisarniarlugu sulipput
Ilulissat avannaatungaani Qeqertap Saqqallu akornanni nunami ikuallanneq 2 kvadratkilometerit missaani annertutigisoq qaminneqarsimanissaa ilimagineqalerpoq.
Qaasuitsup Kommuani Annaassiniartartut, Ilulissani politiit aamma Qaasuitsup Kommunia tusagassiuutinut nalunaarummi allapput.
Qaasuitsup Kommuniani Annaassiniartartut Saqqap Qeqertallu akornanni nunami ikuallattoq qamisarniarlugu ulluni kingullerni ulloq unnuarlu sulisimapput.
- Piffiup panernarnerujussua ikuallattulli ujaqqat ataannut qaarsunulli siaruaassimanera pissutaalluni qamiteriniarluni sulineq ajornakusoorsimavoq. Qaasuitsup Kommuniani qatserisartoqarfinni sisamanit piffimmi qatserisartuliisoqarsimasoq, kommuni paasissutissiivoq.
Ikuallanneq qanoq aallartissimanersoq politiinit paasiniaaffigineqaleruttorpoq.
- Nunami innermik atuineq pujortarnerlunniit inuttaasunit mianersuuteqqissaarneqassasoq, Qaasuitsup Kommuniani Annaassiniartartut qinnutigaat, tusagassiuutinut nalunaarummi allassimasoqarpoq.