kommunit avinneqarnerat

Avannaani kommunimi sulisut suli nalornissutigineqartut

Sulisut sumut inissinnissaannut isumaqatiginniarnerit aallartinneqarnissaannut Qaasuitsup Kommuniata Kommune Qeqertalik utaqqiinnarpaa

Qaasuitsup Kommunias hovedkontor i Ilulissat. Arkivfoto

Qaasuitsup Kommuniata avinneqarnissaa ukiumi nutaami pisussaq qalliartupallappoq, taamaattoq kommunimi sulisut 143-t siunissaat suli aalajangiiffigineqarani. Sulisullu qanoq kommuninut nutaanut marlunnut, Avannaata Kommunia aamma Kommune Qeqertalimmut qanoq agguataarnissaat apeqqutaavoq. Taamalu sulisut qanoq amerlatigisut nuussanersut suli aalajangiuffigineqarsimanani.

Sapaatip-akunnerata siuliani sulisut siunissaat sapaatip-akunnerani uani aalajangiuffigineqarniartoq oqaatigineqaraluarpoq, aalajangiinissarlu kinguartinneqarpoq.

Atuaruk: Kommuneqarfimmi sulisut 143-rut siunissaat sapataatip-akunnerisa tulliani aalajangiuffigineqarniartut

Kommune Qeqertalik utaqqineqartoq

Qaasuitsup Kommuniani kommunaldirektør, Hans Eriksen naapertorlugu, Kommunip Qeqertaliup kommunissamini qanoq aaqqissuussiniarnera kisiat utaqqineqarpoq.

- Kommune Qeqertalimmi ikaarsaariarnermut ataatsimiititaliap sapaatiuppat ataatsimiileruni oqaluuseriniaraat takusinnaavara. Tamatuma kingorna, atorfiit suut kommunini neqeroorutigiumaarnerigut paasinarsiumaarpoq, Qaasuitsup Kommuniani kommunaldirektøri, Hans Eriksen oqarpoq.

Taanna erseqqissaavoq, politikkikkut aalajangiisoqartinnagu, tamanna oqaaseqarfigineqarsinnaanngitsoq. Neriuutigaalu Kommune Qeqertalik sapaatiuppat ataatsimiinnerata kingorna tamanna paasinarsiumaartoq.

Kommune Qeqertalimmi borgmesterinngortussaq, Ane Hansen (IA), sapaatip-akunnerata siuliani Sermitsiaq.AG-mut oqaatigisimavaa sulisut agguarneqarnissaat pillugu Qaasuitsup Kommunia utaqqineqartoq.

Atuaruk: Sulisut agguaanneqarnissaat kinguaattoorfiungaatsiartoq

Isumaqatiginninniarnerit sapaatip-akunnerata tulliani neriuutigineqartut

- Aasarli utaqqilerpugut, neriuutigaaralu sapaatip-akunnerata tulliani sulisut isumaqatiginninniarfigiumaarlutigit, Hans Eriksen oqarpoq.

Isumaqatiginninniarnerit suli aallartinneqarsimanngimmata, kommunimi sulisut illoqarfimmut allamut nuuttussat qanoq neqeroorfigissanerlugit, Qaasuitsup Kommuniani kommunaldirektørip oqaatigisinnaanngilaa,

Hans Eriksen paasissutissiivoq, kommuni sulisunut isumaqatiginninniarneq sapaatip-akunnerata tulliani, sisamanngornermi ulloq 5. oktober aallartinneqassasoq. Naatsorsuutigineqarporlu sulisut 143-t 60-40 procentimik agguarneqassasut, taakkunannga amerlanerit Avannaata Kommunissaani innuttaasut amerlanerineri pissutigalugu suliinnassapput.

Powered by Labrador CMS