Kommunimut qinersineq 2017
Avannaani isumaqatigiinnginneq - Ane Hansen borgmesterinnguinnassaaq
Unnuaq kingusissukkut IA-mi Siumumilu ilaasortat amerlanerussuteqartut Enok Sandgreenip Siumumeersup Atassummi ilaasortamut Naja Petersenimut isumaqatigiissutaa akerleraat. Taamaasilluni IA-meersoq taagorneqarluarsimaqisoq Ane Hansen Qaasuitsup Kommuniani borgmesterip issiavianut ingissinnaanngorpoq.
- Qaasuitsoq Kujalleq pillugu Atassummi Siumumilu ilaasortat toqqakkat ilaasa atsioqatigiillutik isumaqatigiissutaat kommunalbestyrelsinngortussat akornanni amerlanerussuteqarfigineqanngitsoq paasinarsivoq. Taamaammat Inuit Ataqatigiit isumaqatiginninniarnitik nangippaat amerlanerussutilinnillu tunuliaqutaqarlutik isumaqatigiissuteqarsimallutik, tusagassiuutinut nalunaarummi ataatsimut nassiunneqartumi IA-meersup Hans Aronsenip Siumumeersullu Otto Jeremiassenip atsiorsimasaanni ilaatigut tamanna paasissutissiissutigineqarpoq.
Siumukkormiut arlallit
Taamaasillutik Siumukkunni ilaasortat tallimaasut IA-meersoq Ane Hansen tapersersorpaat.
Katillugit ilaasortat aqqaneq-marluusut amerlanerussuteqartut tapersersorpaat.
Inuit Ataqatigiinniit:
Ane Hansen
Peter Olsen
Hector L. Sørensen
Aqqa Samuelsen
Hans Aronsen
Thomas Petersen
Niels Kristensen
Siumumiit:
Jess Svane
Timooq Mølgård
Otto Jeremiassen
Kristian Jeremiassen
Kristian Broberg
Allaaserisami ima qulequtalimmi ”Kommuni nutaaliortoq ataqatigiissaarluakkamik nukittuunillu aqutsisulik” Ane Hansenip borgmesterinngornissaa paasititsissutigineqarpoq, Siumumeersullu borgmesterip sinniisussaatut inissaq tigussagaat. Suli kina borgmesterip sinniisussaatut inissinneqassaersoq nalunaarutigineqanngilaq.
- Qinigaasugut isumaqatigiissummik atsiortugut innuttaasut qitiutillugit patajaatsumik, uppernassusilimmik minnerunngitsumillu tamat oqartussaaqataaneranik tunngaviusumik pingaartitaqarluta kommunip aqunneqarnissaa pingaartipparput, tusagassiutinut nalunaarummi unnuaq nal. 01.44 nassiunneqartumi taamatut allassimasoqarpoq.
Isumaqatigiissut iluatsinngitsoortoq
Enok Sandgreenip tallimanngormat ualikkut Siumumiit siuttutut Atassummi ilaasortamut Naja Petersenimut isumaqatigiissusiorsimagaluarnera pisariaqarsimanngikkaluartoq paasinarsivoq.
Enok Sandgreenip taamaaliorsimanera annertuumik naammagittaalliutigineqarsimagunarmat Siumumi ilaasortat tallimaasut parteertik tunullugu IA-kkunnik ingerlaqateqalerput.
Enok Sandgreen marlunngormat kommunimut qinersisoqarnerani Jess Svanemiit sanilliullugu qinersiseqannginneruvoq.
Makku qinerneqarnerpaapput:
Ane Hansen 350-nit qinerneqartoq
Jess Svane 185-nit qinerneqartoq
Enok Sandgreen 182-nit qinerneqartoq
Naja Petersen 93-nit qinerneqartoq