Avannaani isumannaatsuuneq piginnaanngorsarneqarpoq
Qamuteralaat qamutillu larvefodillit Pituffimmi Thule Air Basemeersut Avannaani Sar-imik ingerlatsinerit piginnaanngorsarpaat
Avannaani ujaasinermi annaassiniarnermilu (Sar) Thule Air Basemik suleqateqalernissaq aggustimili piareersarneqarsimavoq. Maanna tamanna kinguneqarpoq Thule Air Basep Issittumilu Sakkutooqarfiup Sar-imik ingerlatsinermi qaninnerusumik suleqatigiilernissaminnik isumaqatigiissuteqarnerannik, Sermitsiaq allappoq.
– Thule Air Base tamatigut suleqatigisarsimavarput, Sar-imik piareersimanermi Thule Air Basemi mittarfik atorneqartarsimalluni, aalajangersimasunilli ingerlatseriaaseqanngitsumik aammalu akuttunngitsumik sungiusaqatigiinnertaqanngitsumik, Issittumi Sakkutooqarfiup Joint Operations Centremi pisortaq Michael Hjort paasissutissiivoq.
Qamuteralaat, ATV-t angallatillu
– Thule Air Basemik Sar-imik suleqatigiinnissamik nutaamik isumaqatigiissuteqarnikkut isumaqatigiissutigaarput tamanna qanorpiaq ingerlassanersoq, inuillu attaveqarfiit aalajangersimasut attaveqaqatigiinnermilu aqqutissat malittarisassatut aalajangersarneqarsimapput. Assersuutigalugu maanna Thule Air Basep ingerlatsivianit paasissutissanik pilersorneqartalissaagut, tamatumani ilanngullugu assersuutigalugu qamuteralaat, ATV-t angallatillu qanoq amerlatigisut Thule Air Basep piginerai.
Ilisimasassat tamakkua pingaaruteqartuupput, tassami sakkutooqarfik Thule Air Base nammineq atortussaateqarpoq, pisuni amerlasuuni ajutoorfimmut qaninnerusunik, taamaattumillu pitsaanerusumik ikiuukkiartorsinnaalluni. Issittumi Sakkutooqarfiup sakkutooqarfik timmisartunik umiarsuarnillu ikiortassavaa, ajornartoornermi sungiusarnermiluunniit tamakkua atorfissaqartinneqarpata, Michael Hjort oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: