Avannaani immiorneq atugaasupilussuaq
Aalakoornartumik immiorneq inerteqqutaasoq atugaasupilussuuvoq, naammattoorneqaraannili tamanna akisunaarneqarsinnaavoq, siusinnerusukkut immiortarsimasoq, akiliisitaarujussuarsimasorlu oqarpoq
Angut Avannaani illoqarfimmi najugaqartoq politiit ukiut marluk matuma siorna immiortarnera unitsimmassuk 10.000 koruunik akiligassinneqarsimavoq.
Aviisimit Sermitsiamit angut pineqartoq oqaloqatigineqarsimavoq.
Angut kinaassutsimik isertuusserisuttoq, Sermitsiamit kinaasoq ilisimaneqartoq, ukiorpassuarni nammineq atugassaminik immiortarsimavoq. Inigisamini immiortuaannarmat najukkami innuttaasut ilaannit unnerluutigineqarsimavoq. Angut utoqqasaanngulersoq aviisimut Sermitsiamut oqarpoq, inuppassuit namminneq atugassaminnik qaammatit tamaasa liitererpassuarnik immiortartut.
Imigassaq inerteqqutaasoq taanna dunkini 25 liiteriusuni qattaaniluunniit sananeqartartut, qapuit panertut, sioraasat, sirup, kigutaarnat, kuannit, saftit ananassillu qillertuusaniittut naatsiiallu imermut akuliullugit atorneqartartut ilagiinnarpaat. 25 liiterit missaannik immiorneq 100 koruunit missaannik naleqartartoq, angut kinaassutsimik isertuussisoq ilisimatitsivoq. Aamma imigassaq taanna inerteqqutaasoq saftit puuinut to liiteriusunut immiuteriarlugu 50 koruunit 100 koruunillu akornanni akilerlugu Avannaanni tuniniarneqartarpoq.
Immiortarneq pillugu aviisimi Sermitsiami paasisaqarnerusinnaavutit, uani pisiaralugu iserfigisinnaavat: