Avannaani immikkut umiarsualiisoqassanngilaq
Avannaani angallanneq kipiluttunartoq ikiorserniarlugu immikkut umiarsualiisoqarnissaanik Naalakkersuisut pilersaaruteqanngillat
Naalakkersuisut isumaqarput Avannaani angallassinermik ajornartorsiuteqarnermut umiarsuliineq aaqqiissutissaanngitsoq. Tamanna Pele Brobergip (PN) §37 naapertorlugu apeqqutaanut akissuteqaammi takuneqarsinnaavoq. Pele Brobergip paaserusussimavaa, Avannaani angallanneq kipiluttunartoq ikiorserniarlugu sikunnginnerani angallatinik anginerusunik attartornissamut pilersaaruteqartoqarnersoq.
- Kaperlannerani qulimiguulimmik angallassinermi ukiumoortumik ajornartorsiuteqarnermut atatillugu sikunnginnerani nammineq umiatsiaaqqat atorlugit angallassisoqartartoq tusarneqartarpoq. Innuttaasut qanorluunniit pisoqaraluarpat pitsaanerpaamik sullinneqarnissaat qulakkeerneqartariaqarpoq, apeqqummut tunngavilersuut taamatut nipeqarpoq.
Umiarsualiisoqassaanngiarli, attaveqaatinut naalakkersuisoq Karl Frederik Danielsen (S) erseqqissaavoq.
- Avannaa ullumikkut qulimiguulinnik timmisartunillu taamaallaat sullinneqarpoq. Anginerusumik umiarsualiineq siunertaq naapertorlugu naammassineqarsinnaassanersoq annertuumik qularnarmat, juullikkunni angallanneq oqilisaaffiginiarlugu Naalakkersuisut attartornikkut anginerusumik umiarsualiinissaminnik pilersaaruteqanngillat, akissuteqaammi allassimavoq.
Pele Brobergip aamma paaserusussimavaa timmisartuussisarnermi ajornartorsiutaasartut iliuuseqarfiginiarneqarnersut.
- Kaperlannerani qulimiguulimmik angallassineq pitsaanerpaaffimmiisinniarlugu, nunap immikkoortortaani ingerlatsisut Naalakkersuisut ataavartumik suleqatigisarpai, akissuteqaammi allassimavoq.
- Isumannaatsumik angallassinissaq pillugu, kaperlannerani timmisartuussineq pillugu malittarisassat suliarineqarput. Tassanngaannaq angallassinerit SAR-imillu ingerlatsinerit pineqartillugit, malittarisassat allat atuupput. Taamaattumik kaperlannerani timmisartuussineq pillugu malittarisassat innuttaasunut isumannaatsuutitsinissamut sunniuteqarnerata uparuarneqarnera Naalakkersuisut ilisarisinnaanngilaat, kaperlanneranimi annerusumik isumannaatsuutitsinissaq malittarisassatigut anguniarneqarmat.