Avannaani imigassaq ammatiinnarneqassasoq
Avannaata Kommunia nunami kommunini kisiartaalluni imigassamik niueruteqarnissamut sassaallernissamullu ulluni makkunani ammatitsiinnarpoq. – Oqartussat maanna killilersuutigisaat naammattut upperaarput, borgmesteri oqarpoq.
Borgmesterinit tallimaasunit sisamat kommuniminni imigassamik sassaallertarnerup tunisaqartarnerullu inerteqqutaagallarnissaannik Naalakkersuisunut piumasaqarsimapput.
Avannaata Kommunianili borgmesteri Palle Jerimiassen taamatut piumasaqarsimanngilaq.
Borgmesteri kommunalbestyrelsimi partiit gruppiisa siulittaasui isumasioreerlugit aalajangersimavoq, Naalakkersuisunut taamatut piumasaqarniarani
- Kommunalbestyrelsimi partiit gruppiisa siulittaasuilu peqatigiilluta, kommunimi imigassamik aalakoornartortalimmik tunisaqartarnerup matuneqarnissaanik qinnuteqarusussimanngilagut. Sulinitta tuniluuttoqarneranut naleqqussarneratigut piffissaq ajornerpaaq qaangersimavarput, tuniluuttoqarnera taamaalilluta anigorsinnaasimallutigut, borgmesteri Palle Jerimiassen Sermitsiaq.AG-mut oqarpoq.
Upernavimmi kingullertigullu Ilulissani tniluuttoqangaatsiarnera misigisimavarput, tunillanneqarsinnaannginnerullu maanna atorneqalernissaa naatsorsuutigineqarluni. Maannakkorpiaq Uummannami tuniluuttoqangaatsiarpoq.
Maanna inissisimaffik maannatut itsillugu isumagineqartoq
Palle Jerimiassen isumaqarpoq, isumalluutinik naleqqussaanikkut innuttaasut kommunimit, politiinit peqqinnissaqarfimmillu kiffartuunneqarnissamik sullinneqarnissamik pisariaqartitatik suli pissarsiarisinnaagaat. Aamma imigassamik matunerup ajornartorsiutaasartut ilaat asuli kinguartiinnassagai.
- Imigassamik matusinerup ajornartorsiutaasartut sapaatip-akunnerisa marluk missaannik asuli kinguartiinnassavai. Tamannalu atorusunnagilarput. Sulinitsinnik naleqqussaasarnermik misilittagarpugut, innuttaasut kiffartuuttuarniarlugit. Coronalli qanoq ingerlanera ullut tamaasa malinnaaffigiuarparput, pingartumik tuniluuffiusut, isumaqarpungalu pissutsit maanna atuuttut isumagilluarsimallutigit, Palle Jerimiassen nassuiaavoq.
Borgmesterip ilanngullugu oqaatigaa, Avannaata Kommuniakommunitut takornariaqarfissuusoq, inuppassuit nerianiartarfinni sulisarlutik. Imigassamik aalakoornartortalimmik sassaallernissamut tunisaqarnissamullu inerteqquteqarallarnerup inuussutissarsiortut unitsivittussaavai, pingaartumik Ilulissani, Naalakkersuisulli sassaallertarfinnut killilersuutaat unitsitsigallaarnartussaallutik.
- Oqartussat pissutsinik isumaginninnerat tatigaarput. Tuniluuffiunerpaamiilersimalluta piffissap ilaani nalilerutsigut, killilersuutinik amerlanerusunik soorunami malitassatsinnik atuutsitsilissaagut, borgmesteri oqarpoq.