Avannaani eqqakkat ikuallanneqartut
Avannaata Kommunia eqqakkanik silami ikuallaanissamut immikkut akuersissummik peqqeqqammerpoq. Upernavimmi eqqaavissuarmi eqqakkat ikuallallugit maanna ikilisarneqalersut, kommunip nittartakkamini ilisimatitsissutigaa.
Avannaata Kommuniani illoqarfinni nunaqarfinnilu, Ilulissat minillugu, eqqaavissuarni silami ikuallaasoqarsinnaalerpoq.
Namminersorlutik Oqartussammi kommunip eqqaavissuarni silami ikuallaanissamut immikkut akuersissummik 18. juni tunivaa. Immikkut akuersissut qaammatini pingasuni atuutissaaq.
Avannaata Kommunia nittartakkamini taama ilisimatitsivoq.
- Qaammatit pingasut taakku sapinngisamik atorluarniassavagut. Immikkut akuersissuteqartoqareersorlu eqqakkat naafferakkaanik ikuallattaratsigit ikiliartulertorput. Eqqaavissuaq ulikkaavikkaluarami, allaat eqqagassat inissaarukkaluarlutik, atorfilittaq Nicky Kristiansen, eqqagassalerinermi ingerlatsisumut aasaanerani sulinngiffeqartumut paarlattaasoq nittartakkamut oqarpoq.
Ikuallaaviit malinnaasinnaanngitsut
Avannaata Kommuniani inoqarfiit amerlanerit eqqakkanut ikuallaaveqaraluartut, taamaattoq eqqaavissuarni eqqakkat ikilisarniarneri ukiut tamaasa ajornartorsiutaasarpoq.
- Upernavimmi ikuallaaveqaraluarpugut, anorili illoqarfiup tungaanut sammigaangat ikuallaavimmi imaluunniit containerini ammasuni eqqakkanik ikuallaasinnaasannginnatta eqqakkanut malinnaasinnaanngilagut. Nunaqarfinni ikuallaaviit amerlanerit ajoquteqarlutik atorsinnaanngimmata silami ikuallaasariaqartarput, taamaammat silami ikuallaanissamut immikkut akuersissuteqarneq eqqakkat ikilisarnissaannut atorluarniassavarput, Nicky Kristiansen oqarpoq.
Avannaata Kommunia eqqagassalerinermut aaqqiissutissamik najukkamut tulluartumik suli suliaqartoq, kommuni ilisimatitsivoq.
Kommuni nuna tamakkerlugu eqqakkat pillugit suleqatigiinnermit, ESANI-mit 2019-imi peqataajunnaarpoq.