Avannaani borgmesterissaaq: Minik Høegh-Damip Sakio Fleischer innersuuppaa

Avannaata Kommuniani qinersinermi taaneqarnerpaaq, Minik Høegh-Dam aalajangerpoq partiiminni qinigaanerpaatut tulliusoq kommunimi borgmesterinngortussatut innersuutissallugu.

Avannaata Kommuniani taaneqarnerpaaq, Minik Høegh-Dam kommunimi borgmesterinngorniartussatut innersuunneqarnerminit maanna tunuarpoq, Facebookiminilu ilisimatitsissutigalugu partiiminni qinigaanerpaat tullertut inissisimasoq borgmesterissatut innersuullugu.

- Avannaata Kommuniani innuttaasut toqqissisimanissaat, taavalu torersumik politikkersinnaanissaq eqqarsaatigalugu aalajangiineq pivoq, Minik Høegh-Dam allappoq.

Inuiaqatitta toqqisisimanissaat pillugu aalajangiineq. Politikki inuiaat sinnerlugit pisussaavoq, inuit ataasiakkaat...

Slået op af Minik Høegh-Dam i Onsdag den 14. april 2021

Facebookimini allatamini erseqqissaqqippaa ikiaroornartoq pillugu inatsimmik unioqqutitsisimasutut unnerluunneqarluni eqqartuussivimmi sassartinneqarami pinngitsuutinneqarsimalluni. Maannalu naatsorsuutigaa Nunatta Eqqartuussiviani sassartinneqaruni inernera allanngornavianngitsoq. Suliaq nunatta eqqartuussiviani suliassanngorteqqinneqartoq pillugu qaqugu sassartitsisoqassanersoq suli aalajangerneqanngilaq.

- Borgmesterissaq sullissilluarumaartoq qularutiginngilara. Uangalu tunuarsimaarnanga inuiaqatikka aamma sullissaqqaarpakka, Høegh-Dam ilisimatitsivoq.

Siumumi Avannaata Kommuniani Minik Høegh-Damimut tulliulluni taaneqarnerpaaq tassaavoq Sakio Fleischer, 135-inik taaneqartoq. Tassami Palle Jerimiassen Siumut sinnerlugu qineqqusaarami 338-inik taaneqareerluni, maanna partiimit anisimammat. Sakio Flesicher qinigaaffimmi kingullermi 1. viceborgmesteriuvoq, Uummannameersuullunilu.

Powered by Labrador CMS