Avannaa: Ataatsimeeqqaarnissaq kinguaattoorpoq

Avannaata Kommuniani kommunalbestyrelsemut qinigaasut inissititertumik ataatsimeeqqaarnissaminnut una qaammat aggersarneqarnissartik naatsorsuutigisinnaanngilaat.

"Inissitassat arlaqartut kommunimut qinersinermi inernerusunut tunngasuteqartut aammalu Qinigaasinnaanermut Naliliisartut kommunalbestyrelsimi ilaasortartaat qinigaasinnaanerannik nalilersuinerat" utaqqeqqaarneqassapput kommunalbestyrelsep ataatsimiigiaqqunnginnerani.

Avannaata Kommuniani pisortaanerup naatsorsuutigaa siullermeertumik ataatsimiinnissaq qaammatip tulliani pisinnaasoq.

- Qinersinermi paasissutissat illoqarfinnit nunaqarfinnillu tamanit suli pissarsiarinngilagut, aamaammallu qinersinermi taasinernik kisitseqqissaarinerit naammassisinnaanngikkallarpagut. Tamatuma saniatigut Qinigaasinnaanermut Naliliisartut qinigaasimasut qinigaasinnaanerannik nalilersuinerat suli utaqqivarput.

- Suliallu taakku aatsaat naammassineqareerpata kommunalbestyrelsimi ilaasortat ataatsimiigiaqquneqassapput, tamatumalu maajip ingerlanerani pisinnaanissaa naatsorsuutigaarput, Nick Nielsen, Avannaata Kommuniani pisortaaneq nittartakkami oqarpoq.

Maanna borgmesteriugallartoq, Palle Jerimiassen, kommunalbestyrelsemi sivisunerpaamik ilaasortaareerami kommunalbestyrelsenngortut ataatsimiigiaqqusussaavai. Taassuma borgmesteritut atuuffia aprilip naanerani naassaaq, kommunalbestyrelsellu qinigaaffimmi atuuffiat 1. maj aallartissalluni.

Isumaqatigiissutit atsiorneqassapput

Qinersinermi paasissutissat Ilulissaneersut Uummannameersullu tiguneqareersimapput, qinersinermulli paasissutissat Upernavimmeersut Qaanaameersullu angallannikkut akimmiffeqartoqarsimanera pissutigalugu suli tiguneqaratik. Taamaattumik kisitseqqissaarisoqarnera kinguaattoorfiuvoq.

Taamaakkaluartoq Siumut aamma Naleraq ukiuni sisamani tullerni suliassatut isumaqatigiissummik ullumi nalunaaqutaq 13.00 atsioqatigiissapput.

Borgmesterinngortitsiniarnermut aqqut imaannaasimanngilaq. Siullermik Minik Høegh-Dam borgmesterinngortussaagaluarpoq. Taannali nunatta eqqartuussiviani ikiaroornartoq pillugu inatsimmik unioqqutitsisimasutut sassartinneqartussaagami atorfimmit tunuaannarpoq, kingornalu Siumumit aamma anisitaalluni. Taassuma siuliani Palle Jerimiassen Siumumit anisimavoq, taamaasilluni borgmesteritut ingerlaqqinnissamut periarfissaminik annaasaqarluni.

Kina 2. viceborgmesterinngussava?

Pissutsilli maannakkutut isikkoqartillugit Uummannameersoq Sakio Fleischer borgmesterinngortussanngorpoq, Nalerarlu 1. viceborgmesteriutitaqarluni. Kinali 2. viceborgmesterinnussanersoq suli qulakkeerneqanngilaq.

- Nalerarlu isumaqatigiissutissarput atsioriartorlugu Ilulissanut tikeqqammerpunga. Oqaatigisinnaavara isumaqatigiissut malillugu uanga borgmesterinngussaanga aammalu borgmesterip tulliatut siullertut atorfik Naleqqamit pissarsiarineqassalluni. Borgmesterip tulliatut aappaattut atorfik kikkunnit pissarsiarineqassanersoq suli inissinneqanngilaq, Sakio Fleischer, Siumut oqarpoq.