Avannaa Dronningip tikeraarnissaanut piareersarpoq

Dronning Margrethe nunatsinnut kiisami tikeraartussanngorpoq. Ilulissanut tallimanngornermi tikissaaq, borgmester Palle Jeremiassen aamma Naalakkersuisut siulittaasuat Múte B. Egede tikeraartitsisuussallutik.

Nunatsinni tikeraarneq nalaarluinnarlugu nunatsinni oqaluttuarisaanermi toqutsisimanermik amiilaarnarluinnartumik pisoqarsimavoq. Ilulissani ikuallaavimmi timip toqutap kippakua arfininngornerup unnukkuani nassaarineqarpoq. Dronningip tikeraarnissaa sapaatip akunneranik sioqqullugu politiit sukumiisumik paasiniaanertik aallartippaat, timillu kippakuata ilaanik allamik aamma nassaarlutik.

Borgmester Palle Jeremiassen Sermitsiaq.AG-mut oqaluttuarpoq dronningip tikeraarnermini ingerlavissai tamarmik sisamanngornermi misiligarneqassasut.

Qilanaartoqarpoq

Politiit toqutsisoqarsimaneranik paasiniaasunik amerlangaatsiartunik illoqarfimmiittoqaraluartoq, taamaattoq innuttaasut tikeraarneqarnissaminnut qilanaartut borgmester oqarpoq:

- Aap, tikeraartoqarnissamut innuttaasut qilanaartut malunnarpoq. Aamma isumaqarpunga dronningip tikeraarnera piffissami oqimaattumi tuppallersaatigineqarsinnaasoq. Aamma naatsorsuutigaara dronningip tikeraarnera innuttaasunut toqqissiallatsitsissasoq, Palle Jeremiassen oqarpoq.

Taanna ilisimatitsivoq Ilulissat præsidentinit nunaniillu allaneersunit nuimasunit tikeraarneqartareermat, tikeraarnermi periutsit sungiussimasat maleqqissaarneqartut.

Dronning uani aalateriffigisinnaavat

Dronningi pilersaarut malillugu nalunaaqutaq 12.30 tikissaaq ullorlu ataaseq Ilulissaniissalluni, kingorna Nuummut angalassaaq.

Palle Jeremiassen ilisimatitsivoq dronningimik takunnikkumasut Kangiata Illorsuata eqqaaniissinnaasut nalunaaqutaq 13.30 pulaalerpat. Ullup ilaa pisuttuarnermi aamma takuneqarsinnaajumaarpoq.

Tikeraarnermut pilersaarut aana:

• Tallimanngorneq nal. 12.30 Ilulissanut tikippoq
• Nal. 13.30 Kangiata Illorsua pulaassavaa
• Nal. 15.40 Angalaarneq
• Nal. 18.00 Hotel Arcticimi nereqatigiinneq
• Arfininngorneq nal. 9.30 Ilulissat Katersugaasivia pulaassavaa
• Nal. 15.45 Nuuk – Ilisimatusarfik pulaarneqassaaq
• Nal. 18.30 Katuami pisortatigoortumik nereqatigiinneq
• Sapaat nal. 9.30 Nunatta Katersugaasivia pulaarneqassaaq
• Nal. 10.30 Eqqaaniut uleerneqassaaq
• Nal. 10.45 Kommuneqarfik Sermersuumi ilassinninneq
• Nal. 13.00 Hans Egedep Oqaluffiani biskopinngortitsineq
• Nal. 15.00 Katuami kaffellerneq
• Nal. 16.00 Hans Egedep Illuani tusagassiortunik katersortitsineq
• Nal. 19.00 Biskoppi Hotel Hans Egedemi nereqatigiissitsissaaq

Dronningi ataasinngornermi Pituffimmi Thule Air Base tikeraassavaa, marlunngornermilu Station Nordimiissalluni.