Greenland Eyes Film Festival

Avanersuarmit Tunumiillu filmilianik Film Festivalimi takutitsisoqarpoq

Nuummi Greenland Eyes International Film Festival 2014-ertoqarnera pingasunngornermi naggaserneqassaaq

Filmi 'Sullorsuaq' takutinneqareermat Marc Fussing Rosbachip filmiliortarnini eqqartorpaa. Ukiuni sisamani filmiliortarnermini 100-nik sanaaqarpoq - tamarmik naatsuliaallutik

Nuummi Greenland Eyes International Film Festival 2014-rtoqarnerani Qaanaamit Tunumiillu filimilianik marlunngornermi takutitsisoqarpoq. Aamma tassani saammaasseqatigiinnissaq ilaatigut sammineqarpoq.

Uusaqqak Qujaukitsup piviusulersaarusiaa nammineq filmiliaa 'Aulahuliat' takutinneqarpoq, tassani Inughuit 1953-mi nuutsinneqarnerat sammineqarluni. Tassani Inughuit namminneq sumiorpaluutertik atorlugit nuutsitaasimanertik paasisinnaanagu ersersinniarpaat.

Aamma qimmit nappaalanerat 1987-88-mi eqqartorneqarpoq, oqaatigineqarporlu aatsaat taama ajortigisumik misigitinneqarlutik. Inuk qimmerlu pingaarutilimmik suleqatigiinnerat ersersinneqarpoq. Nuutsitaasimanerannut tunngatillugu aamma suli saammaasseqatigiittoqarsimannginnera takutinneqarpoq.

Sammineqartut allat
Ilitsersuisup Polenimeersup Liev Igor Devoldip filmiliaa piviusulersaarusiaq 'My Norwegian Grandfather' takutinneqarpoq. Liev Igor Devoldip aataava Kalaallit Nunaata avannaani silasiortutut nazistinut sulivoq sorsunnersuup aappaani. Tassani norskit Kalaallit Nunaannut misigissusaat takutinneqarpoq.

Lievip oqaatigaa Kalaallit Nunaannut aataavata nuannarinnittuunera paasisinnaallugu, paasisinnaanaguli sooq nazistit suleqatigisimanerai, aataavami Kalaallit Nunaat norskinit tiguneqassasoq sulissutigisimavaa, aamma taanna paasisinnaanngilaa.

Alutornartoq
Halla Mía ilitsersuisuuvoq islandermiuuvoq inuusuttoq. Piviusulersaarusiaa Bøger med remolade' takutinneqarpoq, taanna atuagaarniami Neriusaami Tasiilamiittumi Gerdap innuttaasunit akuutinneqarnera sammineqarluni. Ulluinnarni pisartut eqqissisimasut takutinneqarput, atuagaarniarlu atuakkat saniatigut innuttaasunik katersuuffiusarpoq.

Festivalimi takutinneqartuni nuannarinerpaasamma ilagaat. Piviusulersaarut Nunatsinni aatsaat takutinneqarpoq, neriuppungalu arlaleriarluni takutinneqarumaartoq.

Nuummi Greenland Eyes International Film Festival 2014-ertoqarnera ullumi pingasunngornermi naggaserneqassaaq.

Klaus Georg Hansen Greenland Eyes Film Festivalimi malinnaavoq, taannalu suleqatigalugu Sermitsiaq.AG-mi allaaserisaa saqqummiunneqarluni.

Powered by Labrador CMS