Avammut tunisat naleqarnerulersimasut: Tunisat 15 procentimik qaffassimapput

Aalisakkanit tunisassianut akigititat ilorraap tungaanut ingerlapput, Kalaallillu Nunaanni avammut tunisat nalingi ukioq manna qaffangaatsiarsimallutik.

Ilaatigut qalerallit avammut tunineqarsimasut kiilumut akia 23,5 procentimik qaffassimasoq, Naatsorsueqqissaartarfiup, kisitsisaagallartut pineqartut erseqqissaasup kisitsisaataasa kingulliit takutippaat:

- 2022-mi januaarimiit septembarimut avammut tunisat nalingi katillugit 3.442 millioner koruuniusimapput. Ukiup siulianut sanilliullugit 449 millioner koruuninik annertu­nerupput, annertuseriarnerlu katillugit 15,0 procentiuvoq. Eqqaamaneqassaarli kisitsisit utaqqiisaagallaq naatsorsuinerummata taamaattumillu kingusinneru­sukkut iluarsiiffigineqarsinnaallutik paasissutissat tamakkiinerusut pigineqa­lerpata, Naatsorsueqqissaartarfimmit allapput.

• Raajat - Raajat januar-septembar 2022-mi avammut tunisaanerisa nalingat 14,5 pct.-imik annertuseriarsimavoq, tamanna 239 mio. kr.-inik naleqarpoq. Avammut tunisat annertussusaat 6,9 pct.-imik qaffappoq akillu 7,2 pct.-imik qaffallutik.
• Qalerallit - Qalerallit avammut tunineqartut nalingat 14,1 pct.-imik annertuseriarsimavoq, tunineqartut annertussusaat 7,6 pct.-imik annikilleriarsimasoq. Taamaalilluni kiilumut akit 23,5 pct.-inik qaffassimapput.
• Saarulliit - Saarulliit avammut tunineqartut nalingat 20,5 pct.-imik qaffariarpoq, tunine­qartut annertussusaat 8,7 pct.-imik annikilleriarsimasoq. Saarulliit avammut tunineqartut kiilumut akia 32,0 pct.-imik qaffariarpoq.
• Saattuat - Saattuat avammut tunineqartut nalingat 16,6 pct.-imik annertuseriarsimavoq, tunineqartut annertussusaat 12,1 pct.-imik annikilleriarsimalluni. Kiilumut akia 32,6 pct.-imik annertuseriarsimalluni.
• Nipisap suaai - Nipisap suaasa avammut tunineqartut nalingat 2,5 pct.-imik annertuseriarsi­mavoq, tunineqartut annertussusaat 19,0 pct.-imik qaffassimallutik. Taamaa­lilluni kiilumut akit 13,8 pct.-imik apparsimapput.