Avammut tunisat aallaqqaammut naatsorsuutigisatut annikilleriarpallaarsimanngitsut

Naatsorsueqqissaartarfiup juulip qaammataata qiteqqunnerani oqaluttuaraa, ukiup qaammataani arfinilinni siullerni aalisarnermit avammut tunisat 13,3 procentimik annikilleriarsimasut.

Annikilleriartoqarnissaa coronap ajornartorsiortitsinera pissutigalugu naatsorsuutigineqarsimaovq, kisitsisilli nutaaqqinnaat takutippaat taamak ajortigisumik pisoqarsimanngitsoq.

Naatsorsueqqissaartarfiummi juunip qaammataan avammut tunisat nalingi 118 millioner koruuninik iluarsiiffigisimavai:

- Iluarsiissuteqartariaqalerneq pissuteqarpoq, Akileraartarnermut Aqutsisoqarfimmut nunanut allanut tunisinermi nalunaartussaatitaanermut tunngasut kingusinaartumik nalunaarutigineqarsimanerat, Naatsorsueqqissaartarfik allappoq.

129 millioner kouuninik annikilleriarsimasut

Kisitsini saqqummiunneqartuni kingullerni juulip qaammataani avammut tunisat aamma ilanngunneqarput, ukioq mannalu qaammatit arfineq marluk siulliit qissimigaaraanni takuneqarsinnaavoq, aalisakkanik tunisassiat avammut tunineqarsimasut nalingi 2.650 millioner koruuniupput.

Juunip juulillu qaammataani avammut tunineqarsimasut nalingi 2019-imut sanilliullugu qaffsinnerupput.

Ukiup siuliani piffissamut tassunga sanilliullugit 129 millioner koruuninik annikinnerupput, annikilleriarnerlu 4,7 procentiulluni.

Kiilumut akigititat appariartortut

Naatsorsueqqissaartarfik naapertorlugu, avammut tunisaasartut pingaarnerit nalingisa apparnerat tunisat akimikkut appariarsimanerannik pissuteqarpoq:

- Raajat kiilumut akiat 4,52 koruunik apparpoq (-11,3 pct.), saarulliit 2,98 koruuninik (-10,1 pct.) qalerallillu 2,51 kouuninik (-6,1 pct.), Naatsorsueqqissartarfik ilisimatitsivoq.