inuussutissarsiorneq

Avammut tunisassiortut uppernassusertik annaagaat

Suliffeqarfik Heca Nuuk, ilaatigut Godthaab Bryghusimik piginnittuusoq, Islandimi tuniniaasinnaalernissaminut ukiumik ataatsimik atuisimavoq. Taamaattorli juullimut immiaaraliaat pilersaarutigineqartutut Islandimut anngutinngitsoorpoq, assartugassanik piareersaanerup aqutsinerullu piffissaq kingullerpaaq atorlugu allanngortinneqarnera tamatumunnga patsisaavoq. Royal Arctic Linep sammiveqanngitsumik ingerlatsinera sullissaannut inuussutissarsiortunut ajorluinnartumik akisusoq, Sulisitsisunit oqaatigineqarpoq

Nicolai Nissen, adm. direktør, Godthåb Bryghus
Tamatumani iluanaarutissaagaluit 100.000 koruunit annaaneqartussat pivallaanngikkaluarlugit, assartuinermi piareersaanermi aqutsinermilu tassanngaannartunik allanngortitsinerit pissutigalugit suliffeqarfittut pikkorippallaanngitsutut isigineqalernissarput pineqarpoq, Heca Nuuk-mi pisortaq Nicolai J. Nissen oqarpoq.

Heca Nuuk A/S-imi pisortap piginneqataasullu, Nicolai J. Nissenip, pissangaqaluni decembari qilanaarisimavaa. Ukiup ataatsip ingerlanerani isumaqatigiinniartoqareersorlu suleqatigisallu piareersaaqatigereerlugit paasinarsivoq Godthaab Bryghusip juullimut immiugai nutaat Bad Santa aamma Tannebaum Islandimi tuniniagaalissasut. Taamali pisoqanngilaq.

– Islandimi tuniniaasinnaalerumalluta koruunit millionit kuartii aningaasartuutigaavut. Tunisassiat siulliit ajunngivissumik piareerneqarput, taamaalillutalu saqqummiussinissatsinnut, aasaanerani sulinngiffeqarnissaq sioqqullugu piareersarneqareersumut piareerluta. Aasalli ingerlanerani nioqqutissanik pilersuineq kinguaattoorfiuvoq, tamatumalu kinguneranik tunisassiornissamut pilersaaruterput ajutoorluni, Nicolai J. Nissen oqarpoq.

Puisit amiinik avammut tuniniaaneq eqqorneqartoq
RAL-ip allanngorartumik ingerlatsinera Nunatta Ammeriviani aamma malugineqarpoq. Qanorpiaq annaasaqaataatiginera naatsorsoruminaappoq, pisortalli Ditte Sorknæsip oqaatigaa, tatigineqarnerminnut atatillugu akisunaarsimagitsik.

– Tamanna uppernassutsitsinnut pisisartullu uatsinnut tatiginninnerannut tunngassutilerujussuuvoq. Assersuutigalugu ilusilersuisartoq ilusilersugassaannut tulliuttunut atatillugu uatsinnit amminik nassinneqarnissaanik neriorsorukku, ammillu pineqartut takkutinngitsoorpata piffissarlu kingullerpaaq atorlugu amminik allanik pissarsiniartariaqassagutta – immaqa qalipaatilinnik, tassa kissaatigisarinngisaraluinik nassikkukku, taava uppernassuserput apeqquserneqassaaq

Allaaserisaq tamaat Sermitsiami saqqummertumi kingullermi atuaruk. Uani ataani linki tooriarlugu akiliilluni aviisi atuarneqarsinnaavoq:

Powered by Labrador CMS