Avammut tunisaqartarnerit tamarmik unitsinneqartut: Pillaatitut iliuuserineqartut aalisakkerivissuarmut eqquisut
Namminersorlutik Oqartussat kaammattuinerisigut Royal Greenlandip Ruslandimik niueqateqarnini unitsippaa.
Royal Greenlandip Ruslandimik niueqateqarnini tamaasa unitsissimavai. Tusagassiorfik Undercurrentnews taamatut allappoq.
Royal Greenlandip tamanna Sermitsiaq.AG-mut uppernarsarlugu oqaatigaa.
- Piginnittuvut aalajangersimapput, Namminersorlutik Oqartussat suliffeqarfiutaasa tamarmik - taamalu aamma Royal Greenlandip - Ruslandimik niueqateqarnitik unitsikkallassagaat, pisortaaneq Mikael Thinghuus oqarpoq.
Nunanut allanut naalakkersuisoqarfimmit sapaatip-akunnerata siuliani ilisimatitsissutigineqarpoq, inuussutissanik niueruteqartarneq pillaatitut maanna iliuuserineqartunut ilaatinneqanngitsoq, erseqqissaassutigineqarlunili pissutsit sukkasuupilussuarmik allanngorsinnaasut. Tamannalu maanna pisimavoq, tassa nunami inuussutissarsiutit annersaat Ukrainemi aaqqiagiinngittoqarnerani toqqaannartumik sunnerneqarpoq.
- Piginnittuvut, tassa Kalaallit Nunaanni naalakkersuisut pisoq manna immikkut illuinnartoq, alianartoq sutigullu tamatigut ajorluinnartoq pillugu pitsaasumik assigiinngitsutigullu oqaloqatigisimavagut, Mikael Thinghuus oqarpoq.
Suleqatigiinnermut kinguneqarsimasoq
Royal Greenlandimit 2014-imi ilisimatitsissutigineqarsimavoq, Ruslandimut 70 aamma 100 millioner koruunit akornanni nalilinnik ukiumut tunisaqartoqartartoq, taamanikkut ingerlatseqatigiiffiup kaaviiaartitaasa tamarmiusut 1-2 procentiisa nalingaannik.
Kalaallit Nunaanni Sulisitsisut ilisimatitsissutigisimavaat, coronap atugaanerani Ruslandimut tunisat amerlisimasut, piffissami pineqartumi Asiamut tunisaqarnissaq ajornarsimalluni. Avammut tunisaqarnermi aningaasanik qanoq amerlatigisunik isertitaqartoqarsimanersoq Royal Greenlandimit maannakkorpiaq ilisimatitsissutigineqarusunngilaq.
Kalaallit Nunaat siorna katillugit 580 millioner koruunit nalingannut Ruslandimut tunisaqarsimavoq.
- Taamatut aalajangertoqarnera soorunami Royal Greenlandimut Ruslandimilu 2010-mili (tamatumalu siornatigut ukiuni aqqaneq-marlunni niueqatigisimasatsinnut) qanimut niueqatigisimasatsinnut ajortumik sunniuteqassaaq - taamatulli aajangertoqarnera tamakkiisumik tapersersorpata. Ataasiakkaarluta pisariaqartitavut iluaqutaanerusussanut sanilliullugit salliutissanngilagut, aningaasatigullu ajornartorsiorneq Ukrainemi innuttaasut pisuussutiginngisaminnik ilungersunartorsiortinneqarnerannut sanilliunneqarsinnaanngilaq, pisortaaneq oqarpoq.